الأصيل نعمة ما تتعوضش
الأصيل نعمة ما تتعوضش
كتبت/د/شيماء صبحي
في ناس وجودها في حياتك بيبقى رزق حقيقي، ناس مهما اختلفت معاهم، ومهما بعدت الأيام بينكم، تفضل مودتهم ثابتة وما تتغيرش. ودول بنسميهم “الأصيل”.
الأصيل مش هو اللي يكون موجود وقت الضحك والفسح والخروجات وبس، لكن هو اللي تلاقيه جنبك وقت الشدة، وقت ما الدنيا تضيق عليك، وقت ما تكون مكسور ومحتاج حد يسندك ولو بكلمة.
المودة الحقيقية عمرها ما كانت بالكلام الحلو وبس، ولا بالهدايا ولا بالمجاملات، المودة الحقيقية بتبان في المواقف. بتبان لما تغلط في حق حد ويعذرك، ولما تمر بظروف صعبة وما يسيبكش، ولما يغيب عنك شوية ويرجع وكأن الغياب ما حصلش.
عشان كده، لا تدوم المودة إلا مع الأصيل، لأن غير الأصيل بيتغير مع الظروف، مرة يحبك عشان محتاجك، ومرة يبعد لما مصلحته تخلص، ومرة يختفي أول ما الحياة تضغط عليه.
أما الأصيل، فهو ثابت، قلبه ثابت، ومشاعره ثابتة، وعلاقته بيك مبنية على المحبة والاحترام مش على المصلحة.
ولو ربنا رزقك بشخص أصيل في حياتك، حافظ عليه، لأن الزمن بقى صعب، والأصيل بقى نادر، والقلوب الصادقة قلت، واللي بيحب بصدق ويفضل على عهده رغم كل شيء، يستحق التقدير والتمسك به.
وفي النهاية، مش المهم كام شخص حواليك، المهم مين فيهم أصيل، لأن شخص واحد أصيل، خير من مئة شخص وجودهم مرتبط بمصالحهم فقط.
