الأنوثة وعي
الأنوثة وعي
كتبت/شمس فتحي
بطلي تدوري على الأنوثة في المراية
الأنوثة مش فستان ضيق ولا ميكب كامل ولا شعر طويل كل دي حاجات حلوة، بس دي قشرة.. مش هي الأنوثة
الأنوثة الحقيقية من جوا مش من برة
الأنوثة وعي
إنك تبقي فاهمة نفسك
فاهمة امتى تكوني قوية
وامتى تكوني ضعيفة امتى تتكلمي وامتى تسكتي امتى تقربي وامتى تبعدي
الست الواعية هي اللي عارفة قيمة نفسها مش مستنية حد يقولها انتي حلوة ولا لأهي عارفة هي مين
وعيها بيخليها متتضحكش عليها بكلمتين
الأنوثة ثقة
مش الثقة اللي صوتها عالي وبتزعق
لا اللي تدخل أي مكان وهي واثقة إنها كفاية
واثقة وهي ساكتة واثقة وهي بتتكلم واثقة حتى وهي مش في أحلى حالاتها
الثقة بتخليكي تمشي الكل يبص عليكي من غير ما تقولي كلمة واحدة الثقة هي اللي بتلبسك مش الهدوم
الأنوثة قوة من نوع مختلف
مش قوة الراجل
قوة الست أنعم وأذكى بكتير
قوتك في حنيتك اللي بتداوي
في صبرك اللي بيعدي الصعب
في دموعك اللي بتنضف قلبك وتقومي بعدها أقوى في قدرتك إنك تحضني وتحتوي وتطبطبي وتخلي البيت كله يتنفس بيكي
قوتك مش إنك تبقي زيه
قوتك إنك تبقي انتي
لو نفسك تفهمي نفسك أكتر
متسأليش الناس شايفاكي ازاي
اسألي نفسك انتي شايفة نفسك ازاي
اعرفي قيمة أنوثتك ابني شخصية متوازنة قوية وطيبة ذكية وحنينة واثقة ومتواضعة في نفس الوقت
متفقديش طبيعتك عشان ترضي حد
الدنيا مليانة نسخ خليكي انتي الأصل
خليكي الست اللي لما تدخل مكان يقولوا “الله”مش عشان شكلها عشان طاقتها وعيها ورقتها اللي مليانة قوة
