الحب الأول مش حبك الحقيقي ده أول درس في حياتك

كتبت/د/شيماء صبحي 

دايمًا الناس بتحكي عن الحب الأول وكأنه أسطورة، وكأن مفيش بعده حب، ولا قبله كان فيه معنى.

بس الحقيقة إن الحب الأول مش الحب الحقيقي، ده مجرد درس تقيل بس مهم بيعلمك حاجات عمرك ما كنت هتعرفها من غير ما تعيشها.

الحب الأول بيخليك تكتشف إنك مش بطل فيلم رومانسي، وإنك مش هتلاقي اللي قدامك كامل ومثالي زي ما كنت متخيل. بتتعلم إن في فرق بين “الانبهار” و”النضج”، وإن قلبك ساعات يسبق عقلك ويوديك في طريق غلط.

من خلاله بتفهم إن:

مش كل اللي يقول كلمة حلوة يبقى صادق.

ومش كل اللي يضحكلك يبقى عايزلك الخير.

وإنك لازم تحافظ على كرامتك زي ما بتحافظ على قلبك.

الحب الأول بيكشفلك إنك ممكن تدي كتير من غير ما تاخد حاجة تساوي اللي قدمته، وساعتها بتفهم إن العطاء لازم يبقى متوازن، مش استنزاف.

وبيوريك إنك لو سبت نفسك للمشاعر من غير عقل، هتتعب وتوجع، وساعتها تبدأ تحط أول قوانينك الخاصة في العلاقات: حدودك، احترامك لنفسك، وازاي تختار صح.

الحب الأول مش نهاية العالم، بالعكس.. هو بداية “وعيك العاطفي”. بيكسر عندك فكرة إن الحب لازم يبقى مثالي، وبيخليك تعرف إن الحب الحقيقي مش اللي يخليك تعيط طول الوقت، ولا اللي يخليك تفقد نفسك، الحب الحقيقي هو اللي يضيفلك مش ياخد منك.

يعني الحب الأول هو “المعلّم القاسي” اللي بيدخلك امتحان من غير ما يديك ورق مذاكرة، لكنه بيخليك تخرج من التجربة أقوى، أوعى، وأكثر فهمًا للحياة والناس.

وفي يوم من الأيام لما تبص ورا هتقول: “الحمد لله على الدرس اللي كسرني ساعتها.. علشان هو اللي بناني دلوقتي.”