الحب كمان محتاج ميزان

الحب كمان محتاج ميزان

كتبت/ د/ شيماء صبحي

من واقع الحياه 

في حياتنا ساعات بيعدّي علينا أشخاص بيبقوا زي محطة مهمة جدًا.. بنفتكر إنهم هدية، وإن وجودهم في حياتنا رزق، لكن الحقيقة إن كل شخص بيدخل حياتك جاي برسالة أو درس، حتى لو كان الدرس موجع.

أنا مثلًا كان عندي شخص غالي جدًا عليا، كنت بعتبره أمان، أقدر أكون قدامه من غير حواجز، أدي له كل الحب اللي جوايا من غير ما أفكر. بس اللي اتعلمته منه إن حتى الحب والمعزة لازم يبقوا بحساب. لأنك لما بترمي كل مشاعرك وثقتك قدام شخص من غير أي توازن، ساعات هو نفسه ما بيعرفش قيمتها.

 الدرس اللي وجعني وبقى نعمة دلوقتي، إنك مهما كان غلاك لحد، لازم تسيب مساحة لنفسك، تحافظ على كرامتك، وعلى قلبك. الحب مش اندفاع وبس.. الحب نضج، وإدراك، وتوازن.

 الإيجابيات اللي خرجت بيها:

1. بقيت أقدّر نفسي أكتر وأعرف إن مش كل اللي جوايا يتقال.

2. اتعلمت إن اللي يحافظ على مساحته بيحافظ على قيمته قدام غيره.

3. اكتشفت إن مش كل حب صادق محتاج يتعبّر عنه بشكل مبالغ فيه.

السلبيات اللي واجهتني وقتها:

1. الألم إني حسيت إني اندفعت واتسرعت.

2. الإحباط إني ما لقيتش نفس التقدير اللي كنت متوقعاه.

3. صدمة الثقة إني سلمت مشاعري كاملة لإنسان ما كانش مستوعبها.

 خطوات عملية:

خلي مشاعرك موزونة زي كفة الميزان: لا إفراط ولا تفريط.

ادي مساحتك قدام أي حد، مهما كان غالي عليك.

افتكر دايمًا إن الغالي النهارده ممكن يبقى ذكرى بكرة، واللي بيبقى معاك هو نفسك.

خليك واضح في حبك، لكن من غير ما تفقد حدودك.

في الآخر، أنا ممتنة للشخص ده.. مش عشان اللي عمله كان سهل، لكن عشان الدرس اللي اداهولي كان أثمن من أي حاجة. علّمني إني أحب صح، وأصون قلبي، وأعرف إن مش أي حب ينفع يبان كله مرة واحدة.

 هقولك حكايه حصلت بالفعل

كنت أعرف بنت، بتحب صاحبها جدًا.. من أول يوم دخل حياتها قررت إنها تكون واضحة وصريحة، فتحت له قلبها كله، حكت له أسرارها، بينتله قد إيه بتحبه من غير ما تخبي حاجة. هي كانت شايفة إن دي قمة الحب، لكن هو حس بثقل.. حس إنها مسلّماه قلبها زيادة عن اللزوم، ومع الوقت بقى ياخد حبها كأمر مُسلّم، ومن غير ما يقصد فقد تقديره ليها.

يوم ما قرر يبعد عنها، كانت الصدمة كبيرة.. وقعدت تسأل نفسها: إزاي واحد كنت بعتبره كل حياتي يسيبني كده؟

فضلت تبكي وتلوم نفسها، لحد ما بدأت تفهم الحقيقة: إن اللي بيحافظ على قيمته، بيحافظ على نفسه الأول. وإن اللي بيكشف ورقه كله مرة واحدة بيخسر متعة التقدير خطوة بخطوة.

بعد فترة، البنت دي وقفت على رجليها، وبدأت تتعلم إنها تحب بعقل قبل القلب. بقي عندها مبدأ:

“أنا أديك من روحي وحبي، بس مش هسيب نفسي كلها في إيدك.. لأن اللي يستحقني هو اللي يعرف يقدّر مساحتي ويحافظ عليها”.

دلوقتي لما بتفتكر التجربة، بتقول: “أنا مش بندم إني حبيت، بالعكس.. ده كان درس عمري. بس الحمد لله إني اتعلمته في الوقت الصح.”