الخصم المراوغ للرياضيين من غير ما يحسّوا بيه واللي بيعتبر واحد من أهم أسباب توقف القلب المفاجئ
بقلم د. نجلاء كثير
في إطار مبادرة صحتك أمانة مع طبيبك الرياضي للتوعية الطبية للرياضيين
وبناءً على الاهتمام الذي يوليه الدكتور أشرف صبحي وزير الشباب والرياضة، بصحة وسلامة الرياضيين، وتوجيه معاليه بتطبيق اللائحة الطبية، من خلال إعداد ملف كود طبي محلي أو دولي لكل رياضي يتم تحديثه بصفة دورية.
بنسلط الضوء على الخصم المراوغ للرياضيين من غير ما يحسّوا بيه واللي بيعتبر واحد من أهم أسباب توقف القلب المفاجئ …
إلتهاب عضلة القلب (Myocarditis)
ليه المرض ده مراوغ وخطير ؟
لأنه بيبدأ دايماً بشكل بسيط يخدع الرياضيين وهو ممكن يتسبب في توقف القلب المفاجئ عند الرياضيين الشباب .. إزاي؟
التهاب عضلة القلب بيؤدي لضعف العضلة
وبيأثر على النظام الكهربائي للقلب اللي بينظم ضرباته
وده ممكن يخلي القلب يوقف فجأة أثناء المجهود أو التمرين.
ورغم إن اسمه انتشر بعد كوفيد-19 ، لكنه موجود من زمان جداً …
الأسباب اللي ممكن تؤدي ليه:
🔹 الفيروسات:
ودي السبب الأشهر، خاصة فيروسات الجهاز التنفسي اللي بتسبب برد أو إنفلونزا
زي الفيروس الغدي أو فيروس كوكساكي.
🔹 البكتيريا والفطريات:
أسباب أقل شيوعًا، لكنها ممكن تحصل في بعض الحالات الخاصة.
الأعراض :
المشكلة الكبيرة إنه بيبدأ بأعراض بسيطة جداً كأنه دور برد عادي:
– حرارة
– تعب عام
– آلام عضلات
– شوية ضيق نفس.
وساعتها الرياضي بيقول: “ما هي نزلة برد بسيطة” ويكمل تمرينه!!! لكن ده أخطر قرار ممكن ياخده..
لأن التمرين وقت التهاب عضلة القلب ممكن يسبب اضطراب في ضربات القلب وموت مفاجئ.
إزاي بنكتشف ؟
* لما الأعراض تبدأ تبقى أكتر ( قلبية ) زي :
– ألم في الصدر
– تسارع غير طبيعي في ضربات القلب
– ضيق نفس مع المجهود
* دكتور القلب بيوجه بعمل فحوصات مهمة:
1️⃣ رسم قلب (ECG): بيبين لو فيه اضطراب في ضربات القلب أو إجهاد في العضلة.
2️⃣ تحاليل دم (Troponin): لو طلع عالي يبقى فيه ضرر في خلايا عضلة القلب.
3️⃣ إيكو (Echo): بيشوف قوة ضخ القلب وحركة الجدران لو فيها ضعف أو توسّع.
4️⃣ رنين مغناطيسي للقلب (MRI): أدق وسيلة، بيكشف الالتهاب والتليف بدقة.
5️⃣ عينة عضلة القلب (Biopsy): بتتعمل بس في الحالات الشديدة جدًا.
العلاج:
الراحة أهم من أي دواء
الراحة التامة ضرورية جداً :
الهدف إن القلب يرتاح ويخف الالتهاب تماماً
لأن أي مجهود أو تمرين وقت الالتهاب ممكن يسبب اضطرابات خطيرة ويحصل توقف مفاجئ للقلب.
الأدوية (تحت إشراف الطبيب):
بتكون أدوية لتقوية القلب، مضادات التهاب، ومدرات للسوائل لو فيه احتقان.
إمتى اللاعب يرجع للرياضة؟
العودة لازم تكون بحذر شديد وتحت إشراف طبي.
1️⃣ توقف تام من 3 لـ 6 شهور
حتى لو الرياضي حاسس إنه بقى كويس، القلب محتاج وقت كافي للشفا الكامل.
2️⃣ قبل الرجوع لازم :
• تختفي كل الأعراض
• كفاءة ضخ القلب ترجع طبيعية في الإيكو
• الرنين المغناطيسي يوضح إن الالتهاب اختفى
• رسم القلب وهولتر 24–48 ساعة يكونوا طبيعيين
• اختبار الجهد يطلع من غير أي مشاكل
3️⃣ بعد كده الرجوع للرياضه بيكون بالتدريج :
مشي جري خفيف تمارين خفيفة رجوع تدريجي للتدريب الكامل.
متابعة دقيقة من طبيب القلب لأي عرض أو تعب.
النصيحة الذهبية
ما تتمرنش وقت الحمى أو الإنفلونزا.
اللي ممكن يبان “برد بسيط” و هو التهاب في عضلة القلب
والتمرين وقتها خطر جدداً وممكن يوقف القلب فجأة.
صحتك هي البطولة الحقيقية …
وكل إنجاز رياضي بيبدأ من قلب قوي وسليم
إعداد : أ.د / ياسر حسني عبدالرحمن أستاذ القلب والأوعية الدموية – عضو اللجنة الطبية للإتحاد الدولي بالترايثلون – وعضو اللجنة الطبية بإتحاد الكرة الأفريقي
تنفيذ : الإدارة العامة للشئون الطبية – الإدارة المركزية للطب الرياضي
