اللي حواليك يا يشفوك يا يكسروك
اللي حواليك يا يشفّوك يا يكسّروك
كتبت/د/شيماء صبحي
فيه حاجات في الحياة تأثيرها أقوى من الدوا، وأعمق من أي نصيحة.. وهتلاقي إن “البيئة اللي حواليك” هي أكتر حاجة قادرة ترفعك أو تهدّك من غير ما تاخد بالك.
وجودك وسط ناس فاهمينك، مش بيحكّموا عليك، مش بيستقلّوا بمشاعرك، ناس مش بتوجّعك بالنظرات ولا بالكلمة اللي مالهاش لازمة… ده في حد ذاته علاج.
ليه؟
لأنك أول ما تبقى في محيط آمن، بتتنفّس صح… بتفك إيديك اللي ماسك بيها على قلبك… بتبطل تخاف إنك تقول اللي جواك.
وده لوحده يشيل نص تعبك، وثلثين قلقك، وتلات أرباع ترددك… لأنك خلاص مش محتاج تبقى نسخة محسّنة عشان ترضي حد، ولا تعمل حساب كل كلمة قبل ما تطلع.
البيئة الداعمة بتديك إحساس إنك مش لوحدك… إنك مش مطلوب منك تكون “قوي طول الوقت”، وإن الضعف مش عيب، وإن التعب مش وصمة.
ناس لما تبص في عينهم تحس إنهم شايفينك من غير ما تشرح، وبيفهموا خوفك قبل ما ينطُق… ناس وجودهم في حياتك بيهدّي صوت الأفكار اللي عاملة دوشة في دماغك.
ولو بقى لقيت المحيط ده؟
هتغلط براحتك، وهتصلّح من غير جلد ذات، وهتعرف تكمّل حتى لو وقعت كام مرة… لأنك عارف إن فيه ضهر، وفيه ودن بتسمعك مش بس تسمع صوتك.
وفي المقابل… وجودك في محيط مش فاهمك، أو بيقلّل منك، أو بيسخّف مشاعرك… بيخلّي أبسط خطوة تبان حملة تقيلة.
تفضل قلقان.. متردد.. خايف.. تايه بين إنك تقول ولا تسكت، تقرّب ولا تبعد…
وللأسف ناس كتير بتفتكر إنهم مكسورين من نفسهم، بس الحقيقة إن اللي كسرهم البيئة اللي عاشوا فيها.
التحليل النفسي:
من الناحية النفسية، الإنسان بيتنفس أمان من خلال “العلاقات الداعمة” والـ secure base — القاعدة الآمنة.
وجودك وسط ناس فاهمينك بيعمل الآتي:
يقلّل النشاط الزائد للجهاز العصبي المسؤول عن القلق والتوتر.
يزوّد هرمونات الارتياح زي الأوكسيتوسين، اللي بيخلي الجسم يهدى.
يخفّف النقد الداخلي لأن الدماغ بيفهم إنك في مساحة آمنة، فميعُدّش يحاسبك بقسوة.
يدعم القرار لأن الإنسان لما يحس إنه مفهوم، بيقدر يشوف الصورة أوضح.
يعالج الجرح القديم المتكوّن من علاقات سابقة كانت مليانة رفض وتحقير.
البيئة الصح مش رفاهية… دي ضرورة نفسية، قوة علاجية، وأحيانًا هي الفرق بين شخص بيعافر وبيغرق… وشخص بيعافر وبيعوم.
في النهاية…
اختار محيط يطبطب عليك مش يكسرك، يسمعك مش يحاكمك، يشوف قيمتك مش يقلّلها…
لإن الطمأنينة مش دايمًا دوا… أوقات بتكون “حد فاهمك”.
