المقالات والسياسه والادب
الملفات المعلقة بقلم تغريد نافع
أوقات اكتر حاجة بتتعبنا وتاخد من وقتنا وطاقتنا هي الملفات المعلقة لأي موضوع شاغلك من قصص أو حوارات خلصت في الواقع لكن لسه عالقة في ذهنك ومش بتبطل تفكير فيها ليل نهار.
الحل إيه أو تتعامل إزاي مع الملفات المعلقة دي؟!!
أي موضوع معلق لازم تقفله في عقلك وتحطه على الرف بتاع الذكريات .
لو ذكري جميله اهو عشت لك يومين حلوين من وقت للتاني يمر طيف الذكري تفتكرها وتبتسم وتمتن لربنا أنك عشت أيام جميلة حتي لو مدامتش.
لو ذكري سيئة بقت درس مهم في حياتك واتعلمته وتجربة اثقلت خبرتك وهتتفادي أي غلطة مشابهه في المستقبل.
أما انك تفضل مخلي الملف موجود ومعلق جوه عقلك وتفكيرك كده دي كارثة . لان ببساطة أنت كده سايب جزء من روحك وعقلك وتفكيرك وطاقتك معلق معاها وده معناه انك أيامك بتتسرق. أو واقف محلك سر.
