زمان كنا نسمع بعض السيدات بتقول بشترى دهب واشيله على جنب عشان كل يوم تمنه بيغلي و دى تحويشة العمر تنفعنى فى المستقبل او في كبرى.فى الحقيقة في علاقات في حياتنا بنحط فيها وقت وصحة ومجهود وحب وحنية واحتواء من غير ندم لأن بجد هى دى تحويشة العمر . كل يوم نلاقي عندهم رصيدنا بيعلى وبيقدروا إللي بيتقدم لهم وبيتحط في رصيد محبتنا عندهم. زوجك إللي دلوقتي حبيبك وصديقك بس لو فضلتي تحوشى عنده ذكريات جميلة في كبرك هيبقي عكازك إللي يسندك ،وونسك أما الدنيا تفضى من حواليكي. صديقاتك المقربين إللي دايما معاكي لو فضلتي تحافظي على سرهم وتشاركيهم افراحهم واحزانهم أما تقعى في شدة هتلاقي ايديهم تتمد لك فى شدتك وتقومك من تانى.
ولادك لو شبعتيهم حب وحنان ومفرقتيش بيهم في المعاملة ومظلمتيش حد فيهم على حساب التانى هيبقوا مظلتك إللى تحميكى من عواصف الدنيا.
المهم شيلى تحويشة تنفعك في كبرك ومع الوقت قيمتها تزيد زى الدهب وسط زمن اغلب الناس إللي فيه بقوا فالصو.
