تراكم المشاعر لما القلب يشيل أكتر من اللازم
تراكم المشاعر لما القلب يشيل أكتر من اللازم
بقلم د/إلهام حسنى
في ناس بتتعب من كلمة وفي ناس بتتعب من تراكم سنين.
الموضوع مش إننا حساسين لأ. الموضوع إننا بشر واللي بنشيله جوانا مش قليل.
تراكم المشاعر مش بيحصل في يوم ولا يومين ده بيبدأ من لحظة صغيرة موقف سكتى فيه كلمة وجعتك حاجة ضايقتك وقلتي: ماشي مش مشكلة.
ومع الوقت اللي مش مشكلة بيكبر ويبقى الحمل تقيل.
ليه المشاعر بتتراكم؟
لأننا ساعات بنختار نسكت.
مش ضعف لكن خوف من الزعل خوف من الخناق خوف من إننا نبان مبالغين.
وساعات بنسكت علشان نكمل حياتنا الأطفال محتاجينا الشغل محتاجنا البيت محتاجنا فنركن نفسنا على جنب ونكمل.
ومن كتر ما بنركن نتفاجئ إن قلبنا بقى متلخبط ودماغنا مش مرتبة ونفسنا قصيرة.
إزاي تراكم المشاعر يظهر؟
يظهر في شكل دوخة، صداع، وجع في البطن، خنقة في الصدر.
يظهر في شكل عصبية على حاجات مالهاش علاقة بالموضوع.
يظهر في بكاء مفاجئ أو رغبة إنك تقفلي على نفسك وتبعدي عن كل الناس.
يظهر في جملة: أنا مش عارفة مالي.
وهو في الحقيقة إنتى عارفة مالك بس مش قادرة تقولي.
أخطر حاجة في تراكم المشاعر
إنك تبقي ماشية طول اليوم بتقولي أنا كويسة وإنتى مش كويسة.
إنك تضحكي بس ضحكتك من جوه مجروحة.
إنك تسمعي مشاكل الناس وتنسي إن ليكي قلب برده محتاج اللي يسمعك.
إنك تبقي قوية قدام الكل بس أول ما تقفلي باب أوضتك تتكسري وتبكى
ليه بنوصل للمرحلة دي؟
لأننا بنعطي كتير ومش بناخد حاجة
لأننا بنتوقع دعم من ناس معينة ونتصدم إنهم مش موجودين فى حياتنا.
لأننا بنحاول نكون العاقلين اللي بنعدي اللي مش بنتكبر.
بس الحقيقة إن المشاعر زي المية… لو ما خرجتش من مكانها تتحول لفيضان.
طب نعمل إيه كيف نخفف الحمل إزاى تعالى اقولك ازاي
١/ اعترفي بمشاعرك
قولي لنفسك
أنا موجوعة.
أنا زعلانة.
أنا محبطة.
الاعتراف مش ضعف الاعتراف أول خطوة علاج.
٢/ متسكتّيش عن كل حاجة
مش لازم كل حاجة تتعدي.
في مواقف لازم يتقال فيها لأ
وفي جمل لازم تتقال بوضوح:
الكلمة دي وجعتني.
التصرف ده ضايقني.
ده مش هجوم ده احترام لنفسك.
٣/ خدي مساحة لنفسك
ساعة لوحدك كل يوم.
تكتبي، تسمعي قرآن، تنظمي أفكارك، تشربي حاجة تحبيها.
المساحة دي بتفوقك من جوة.
٤/ اتعلمي تفرغي اللي جواكى
بالكتابة، بالدعاء، بالوجدان، أو بالمشي.
٥/ اطلبى مساعدة لما تحتاجي
مش غلط تقولي لحد:
اسمعني.
طمني.
أنا موجوعة.
ده احتياج طبيعي لأي إنسان.
رسالة لكل واحدة حاسة إنها على وش الانفجار.
إنتي مش قليلة.
إنتي مش مبالغة.
إنتي مش بتعملي دراما.
إنتي إنسانة ليكي حدود وليكي طاقة وليكي قلب.
ولو حملك تقيل ده لأنك شلتي كتير لوحدك.
ولو صوتك واطي ده لأنك تعبتى من كتر ما اتكلمتي وما حدش سمع.
ولو مشاعرك ملخبطة ده لأن اللي جواكي أكتر من اللي بره.
بنت الحلم الكبير
