كشف اللاعب المصري محمود كهربا، في تصريحات عبر برنامج الكورة مع إبراهيم فايق على قناة MBC مصر 2، تفاصيل الأزمة التي تعرض لها خلال فترة تواجده مع نادي القادسية الكويتي.
وقال كهربا إنه واجه صعوبات كبيرة بسبب ما وصفه نقص الاحترافية من إدارة النادي، مؤكدًا أن الأمور وصلت إلى حد توقيفه في المطار بعد انتهاء تأشيرته، وهو ما وصفه بـ”حبس فعلي” نتيجة سوء إدارة النادي.
وأضاف كهربا: “كنت ساكت لحد ما خلصت الموضوع بالاتفاق مع المحامي ورفعت شكوى للفيفا للحصول على مستحقاتي وهفسخ عقدي”.
ويأتي هذا التصريح بعد فترة من الخلافات بين اللاعب والإدارة الكويتية، حيث أشار كهربا إلى معاناته من تأخير مستحقاته وتأزم وضعه القانوني خلال تواجده بالنادي، قبل أن يتمكن من اتخاذ الإجراءات القانونية لاستعادة حقوقه.
و كشف محمود عبد المنعم «كهربا»، لاعب القادسية الكويتي، الذي فسخ عقده مؤخرا، عن بعض الصعوبات التي واجهها خلال رحلته في الكويت، خلال الفترة الماضية.
كهربا: لم أحصل على كل مستحقاتي لدى القادسية الكويتي
وقال كهربا، في تصريحات تليفزيونية: «مكنش فيه أي احترافية من إدارة نادي القادسية الكويتي، الموضوع وصل لمرحلة اني اتحبست هناك في الكويت، وكنت ساكت لحد ما أخلص الدنيا بالاتفاق مع المحامي، ورفع شكوى للاتحاد الدولي لكرة القدم (فيفا)».
وأوضح اللاعب: «أنا ليا مستحقات وهفسخ عقدي، خصوصا إن مستحقاتي كانت بتتأخر بالشهرين والتلاتة، وعملت أكتر من جلسة للتفاوض، ومفيش أي حاجة حصلت».
وأضاف: «لما دخلت حجز في مطار الكويت، بسبب مشكلة الفيزا، لقيت 13 مصري اتنين منهم قالولي احنا بقالنا 13 يوم هنا، وربنا بعتك سبب إننا نخرج من هنا، قلتلهم أنا مش هسيبكم والله، بس أعرف أنا وضعي إيه، ما أنا ممكن أقعد معاكم شهر، وفهمت منهم القصة، وقالولي كل اللي عايزينه نرجع بلدنا ومنفضلش محجوزين».
وتابع محمود كهربا: «فعلا الظباط نادوا عليا بعد ساعة ونص، والمحامي بتاعي خلص القصة وظبط الأوراق والسفارة المصرية مسبتنيش، وقبل ما أمشي قلت لموظف السفارة فيه 13 واحد مصري جوا عشان خاطري هما مش عايزين غير إنهم يرجعوا مصر، بعد إذنك حاول تساعدهم قالي إن شاء الله أيام ويرجعوا مصر، وكنت ساعتها زعلان، أول ما قالي كده فرحت، وأنا كنت مديهم رقمي وقلتلهم أول ما تنزلوا مصر كلموني وطمنوني».
كهربا يكشف تفاصيل أزماته في الكويت
وقال لاعب منتخب مصر السابق: «الفيزا بتاعتي وأنا في الكويت كانت منتهية، ومش عاملين ليا إقامة، وكل ما أطلب يعملوا إقامة الموضوع ميتمش، والفيزا كانت خلصانة بقالها أسبوعين، ودي فيها إبعاد».
وأضاف كهربا: «نادي القادسية قالولي لازم تطلع بره البلد، وهترجع تاني، وحجزولي تذكرة الساعة 4 الفجر، دخلت المطار حجزوني واتقبض عليا، وقالوا حبس، ولولا إني كنت منسق مع المحامي بتاعي مكنتش هخرج من الموضوع، واللي كان السبب في الموضوع ده إدارة القادسية كانوا عايزيني اتحبس أو يحصلي إبعاد ومدخلش الكويت نهائي، ومخدتش باقي مستحقاتي».
و أكد محمود عبدالمنعم كهربا لاعب القادسية الكويتي السابق، أنه يمتلك 3 عروض في الوقت الحالي، ولكن لم يفسح عن أي تفاصيل.
وقال كهربا في تصريحات تليفزيونية عبر قناة «إم بي سي مصر 2»: «والله ما أعرف أي حاجة عن موضوع الأفريقي التونسي، ولا حد كملني ولا كلمت حد ولا عرضت نفسي على نادي».
وتابع: «أنا بعد ما أعلنت إني فسخت عقدي مع القادسية جالي 3 عروض»، مشيرا: «أنا بدرس الأمر مع وكيل أعمالي وربنا كريم إن شاء الله.
وكان كهربا قد انتقل إلى القادسية، أغسطس الماضى، فى فترة الانتقالات الصيفية، بصفقة انتقال حر، بعد فسخ تعاقده مع الاتحاد الليبى.
