حرية الاختيار
حرية الاختيار
بقلم د/إلهام حسنى
حرية الاختيار هي المساحة اللي يقدر فيها الإنسان يكون نفسه بكل وضوح بعيدا عن ضغط المجتمع وتوقعات الناس وحكم الآخرين على حياته كل إنسان يستحق يعيش بالطريقة اللي يرتاح لها ويختار الطريق اللي يناسب شخصيته وظروفه وقدرته وراحته بدون ما يضطر يبرر او يدافع عن نفسه حرية الاختيار مش رفاهية ولا حاجة بيدوها للإنسان كأنها منة حرية الاختيار حق حياة حق وجود حق إن الشخص يقرر مصيره بنفسه من غير ما حد يفرض عليه شكل حياته ولا طريقة تفكيره ولا اختياراته اليومية
الناس ساعات بتنسى إن كل إنسان له عقل مختلف وتجارب مختلفة ومشاعر مختلفة وبالتالي اختياراته لازم تكون مختلفة كمان مفيش حد يقدر يعيش مكان حد ومفيش حد يعرف الوجع اللي شافه التاني ولا المعارك اللي بيخوضها ولا الضغط اللي شايله جواه علشان كده أحسن حاجة نقدمها لبعض هي إننا نحترم حرية بعض في الاختيار حتى لو مش فاهمين قرار الشخص أو مش موافقين عليه المهم إنه اختياره هو مش اختيار حد تاني
حرية الاختيار كمان هي اللي بتخلي الإنسان مسؤول عن حياته مسؤول عن نجاحه وعن غلطاته وعن الطريق اللي اختاره بنفسه لما يكون القرار جاي من جواه بيبقى قادر يتحمل نتيجته ويقدر يكمل ويفهم ويتعلم لكن لما يكون القرار جاي من ضغط الناس بيعيش الإنسان طول الوقت حاسس إنه غريب عن نفسه وإنه بينفذ حياة مش حياته ومع الوقت بيخسر إحساسه بذاته
البشر محتاجين مساحة يتنفسوا فيها مساحة يقولوا فيها لأ ومساحة يقولوا فيها آه ومساحة يجربوا ويغلطوا ويتعلموا من غير خوف ولا لوم او عقاب واحترام حرية الاختيار مش معناه فوضى ولا معناه إن الإنسان يعمل اللي هو عايزه بلا حدود لكنه معناه إنه يختار الطريق اللي شايفه مناسب ليه ويتحمل مسؤوليته وهو عنده القدرة على التفكير والتقييم والوعي
حرية الاختيار هي أساس كل علاقة صحية لأنها تبني احترام وثقة ومساحة آمنة الشخص اللي بيحترم حرية غيره في الاختيار هو شخص فاهم إن كل إنسان له قيمة وله صوت وله حق إنه يعيش حياته بالشكل اللي يليق بيه الإنسان الحر هو الإنسان اللي بيفكر بإرادته ويقرر بإرادته ويمشي في طريقه بإرادته ويعرف إنه من حقه يغير رأيه في أي وقت ومن حقه يبدأ من جديد ومن حقه يختار لنفسه من غير خوف ومن غير ما يحس إنه لازم يرضي كل الناس
و حرية الاختيار هي أعظم نعمة يملكها الإنسان لأن من غيرها تتحول الحياة لسجن صامت ومعها تتحول الحياة لرحلة حقيقية يعيشها الإنسان بصدق وبقلب مطمن وبإحساس إنه صاحب حياته مش مجرد متفرج عليها
بنت الحلم الكبير
