خلّي ربنا سندك

كتبت/د/شيماء صبحى 

في وسط الزحمة والدوشة والمشاكل اللي كل يوم بتزيد، بنلاقي عقلنا مشغول طول الوقت… مشغول بأفكار تقلقنا، بمخاوف من بكرة، وبناس يمكن مش بيستاهلوا دقيقة من بالنا. ساعات بتحس إن دماغك شغّالة ٢٤ ساعة على حاجات لو فكرت فيها بجد، هتلاقيها ما تستاهلش نص ثانية.

عشان كده، الدعوة دي مش مجرد كلمات… دي زي طوق نجاة:

“ربي لا تشغل عقلي بما يقلقه، ولا قلبي بمن لا يرحمه، ولا وقتي بما لا ينفعه”.

يعني يا رب، خلّي دماغي في اللي يفرّحني ويطمني، مش في اللي يوجعني ويضيع طاقتي. خلّي قلبي بعيد عن قسوة الناس اللي ما تعرفش الرحمة، ولا تحطني في دايرة حد بيجرحني أو بيقلل مني.

إحنا ساعات بنتمسك بناس وأحداث وكلام… ونفتكر إننا لو سبناهم هنضيع. لكن الحقيقة إن الضياع بيجي لما نحط كل مشاعرنا في إيد حد ما يخافش عليها. القلوب محتاجة أمان، والأمان الحقيقي عمره ما ييجي من بشر، الأمان الحقيقي بيجي من ربنا.

“ربي كن لي وكن معي”… الكلمة دي لو دخلت قلبك، هتحس إنك مش لوحدك أبدًا، مهما الدنيا قلبت بيك. هتعرف إن في قوة أكبر منك بتحميك، وفي رحمة أوسع من همومك شايلة عنك.

وآخر الدعوة: “واجعلني بك أقوى وبك أغنى”… لأن القوة مش إنك ما تقعش، القوة الحقيقية إنك تقوم كل مرة وتقف ثابت عشان ربنا مسندك. والغنى مش في الفلوس بس، الغنى إن قلبك مليان رضا، ونفسك شبعانة باللي عندك، وعارف إن كل حاجة بتروح، لكن ربنا دايم.

خد القرار النهاردة إنك تحرر نفسك من كل حاجة بتسرق وقتك ومودك… ما تشغلش بالك بحد ما بيشغلش باله بيك، ولا تضيع وقتك في حاجة مش هتنفعك في آخرتك.

خلّي قلبك دايمًا مع اللي بيرحمه، وعقلك مع اللي يطمنه، وروحك مع اللي يحييها.

وصدقني… لما ربنا يكون معاك، مش هتحتاج سند من حد تاني.