خمسة جنيه وشيبسي.. هايدي اختارت الخير
خمسة جنيه وشيبسي.. هايدي اختارت الخير
صفاء مصطفى
وسط الزحمة والجري في الحياة لسه في مواقف صغيرة بتفكرنا إن الخير موجود حوالينا.
الطفلة هايدي عملت حاجة بسيطة جدا لكنها دخلت قلوب الناس كلها
هايدي كانت نازلة تشتري فطار وفضل معاها خمسة جنيه قررت تشتري بيهم كيس شيبسي لكن لما شافت راجل محتاج قلبها اتحرك من غير ما تفكر كتير رجعت الشيبسي وأدتله الفلوس وقالت بكل براءة: “دي مش حاجة كتيرة وربنا هيرزقني بأكتر.”
موقف صغير لكنه علمنا درس كبير: إن الخير مش محتاج فلوس كتير ولا إمكانيات ضخمة الخير ممكن يكون في حاجة بسيطة جدًا.. في كلمة في ابتسامة في مساعدة حتى لو بخمسة جنيه
هايدي اختارت غيرها قبل نفسها وده اسمه إيثار.. حاجة بقت قليلة في وقت كل واحد مشغول فيه بمصلحته تصرفها أثبت إن التربية الصح بتبان في المواقف دي وإن الطفل اللي يتربى على الرحمة والمشاركة يكبر ويكون إنسان بيساعد مجتمعه
هايدي يمكن ما اشترتش كيس شيبسي لكنها اشترت احترام وحب الناس وقدمت لينا كلنا درس: البساطة ساعات بتكشف أعظم معاني الإنسانية
وبعد ما انتشرت قصة هايدي ظهر دور المؤسسات الوطنية في تقديم الدعم والتكريم وده مش مجرد تقدير لتصرف طفلة لكنه تأكيد إن المجتمع كله لازم يشجع القيم الإنسانية ويرد الجميل لأصحاب المواقف النبيلة تكريم هايدي هو رسالة واضحة إن الخير لا يضيع وإن الإنسانية مازالت حية وأن دور المؤسسات إنهم يحتضنوا النماذج دي علشان يفضلوا قدوة حقيقية للأجيال اللي جاية.
