المقالات والسياسه والادب
ساعات البُعد مش اختيار ساعات البُعد هو آخر حل لما كل المحاولات تخلص
كتبت/د/شيماء صبحي
ساعات البُعد مش اختيار… ساعات البُعد هو آخر حل لما كل المحاولات تخلص.
في علاقات بنفضل متمسكين بيها مش عشان إحنا مرتاحين، لكن عشان إحنا مش قادرين نتخيل حياتنا من غيرها.
بنفضل نحاول نصلّح، ونتكلم، ونوضح، ونعدّي، ونقول معلش…
ونقنع نفسنا إن اللي حصل كان مجرد موقف، وإن بكرة هيبقى أحسن.
لحد ما ييجي يوم تكتشفي فيه إنك مشكلتك مش إنك مش عارفة تحبي…
مشكلتك إنك بتحاولي تحافظي على علاقة إنتِ لوحدك اللي بتحافظي عليها.
والحقيقة دي بتوجع أوي.
لأن مفيش أصعب من إنك تكتشفي إن كل المجهود اللي كنتِ بتعمليه عشان العلاقة تعيش، كان على حسابك إنتِ.
كنتِ بتسكتي عشان متكبريش المشكلة…
وتعدّي عشان متخسريش الشخص…
وتتنازلي عشان الدنيا تمشي…
وتبرري عشان تفضلي شايفة فيه الحاجة الحلوة اللي حبيتيها في البداية.
بس في المقابل…
كل تنازل كان بياخد حتة منك.
لحد ما بقيتي مش عارفة:
أنا لسه بحب الشخص ده… ولا أنا بس متعلقة بالذكريات اللي كانت بينا؟
وهنا بييجي أصعب قرار…
إنك تمشي.
مش لأنك بطّلتي تحبي، ولا لأنك فجأة بقيتي قوية ومش فارق معاكي…
لكن لأنك أخيرًا فهمتي إن الحب لوحده مش كفاية.
الحب محتاج احترام.
محتاج أمان.
محتاج اهتمام متبادل.
محتاج حد يحس بيك قبل ما تضطري تشرحي وجعك.
إنما لما تبقي كل مرة مكسورة، وكل مرة بتسامحي، وكل مرة بتدي فرصة جديدة… والطرف التاني ولا كأنه شايفك، يبقى لازم تقفي مع نفسك وقفة.
مش كل باب بنقفله بنكون عايزين نقفله…
في أبواب بنقفلها وإحنا نفسنا نفضل واقفين وراها، بس عارفين إن الدخول منها تاني هيكسرنا.
والبُعد في اللحظة دي مش قسوة.
القسوة الحقيقية إنك تفضلي عايشة في مكان بيطفّيكي يوم بعد يوم، لمجرد إنك خايفة من الوحدة.
آه… الوحدة بتوجع.
بس صدقيني، الوحدة أرحم بكتير من إنك تبقي مع حد وتحسي إنك لوحدك.
وأوقات كتير بنفتكر إن أقوى حاجة نعملها إننا نفضل ونستحمل…
مع إن القوة الحقيقية ممكن تكون في إنك تقولي:
“أنا تعبت… ومش هقدر أكمل بالطريقة دي.”
من غير خناقة.
من غير انتقام.
من غير ما تثبتي لحد إنه غلطان.
بس تمشي…
تمشي لأنك عايزة تنقذي اللي باقي منك.
وممكن بعد ما تبعدي تشتاقي…
وتحنّي…
وتفتكري الأيام الحلوة…
وتسألي نفسك ألف مرة: “هو أنا استعجلت؟”
ممكن جدًا.
بس متنسيش إن العقل أحيانًا بياخد القرار اللي القلب مش قادر ياخده.
مش كل اشتياق معناه إننا لازم نرجع.
ومش كل حب معناه إن العلاقة لازم تستمر.
في ناس بنحبهم فعلًا…
بس وجودهم في حياتنا مش خير لينا.
وساعات ربنا بيحط بينا وبينهم مسافة، مش عشان يعاقبنا…
لكن عشان يعلّمنا إن نفسنا وكرامتنا وصحتنا النفسية مش حاجات المفروض نخسرها عشان نحافظ على أي حد.
فلو وصلتِ لمرحلة إنك جربتي كل الطرق، واتكلمتي، ووضّحتي، واستحملتي، وفرص كتير اتدت… ومفيش أي تغيير حقيقي…
متخافيش من البُعد.
يمكن البُعد يوجعك فترة…
لكن الاستمرار في المكان الغلط ممكن يوجعك لحد ما تنسي أصلًا كنتِ مين.
وأحيانًا…
