منوعات

سِتِي … من وحي الأمثال الشعبية

سِتِي … من وحي الأمثال الشعبية

بقلم –  مايسة إمام

سِتِي …

قالت سِتِّي ياخلق زمان
أمثال كتير معانيها تيجان
نادرة تزِين كل مكان كل زمان

قالت سِتِّي
اكفي القدرة بتاعة البِت
تتطلع زي أمها بالظبط
فيها شطارة، فيها مهارة
فيها زفارة ولسان عَتْ
الزرعة بتِفْسَد …..من تحت

قالت ستي:
روح دَوَّر ع الأصل…… وميهمش
إن كان كوخ أو كان قصر
ماهو مش راح يمضي على وصل
دا هيمضي …….على عِشْرِة عُمْر

قالت ستي :
خايفة أهزك ياغربالي
يخفى مايبقى فيك يوم غالي
كله بيُبْرُق كدا بيلالي
دهبه نفيس، صيني رخيص
ربك أعلم باللي أوبالي

قالت ستي. :
لا تلوم على اللي امبارح عارفك
إن كان لحمك قبله…….. بايعك
واوعاك …… تعتب على غريب
قبله قريب ………ماكان صاينك
العبرة احسبها بعقلك

قالت ستي :
غالية دروس الدنيا مش ببلاش
و ثمنها مدفوع لها ……كاش
من أيامك …….وسنين عمرك
اوعي………. تخليه ملح وباش

قالت ستي :
تعرف فلان ومعشرتوش……
تبقي يابني …….متعرفوش
العشرة مرايتها توَرِّي……..
الأصلي….. من الــ مغشوش

قالت سِتِّي. :
قابلني … بالضحكة وهَلَّا
وفاتني…… بالذم ماخَلَّا
حرابية ولها ميت لون
وتعاتب يقولك ……ذَلَّة

قالت سِتِّي :
لقيني ياخال بحلو اللسان
لا بلقمة …..ولا شربة كمان
عسل الكلمة في حلقي يبان
نظرة عينك …….لي ميزان

قالت سِتِّي :
لا تجـافي ولا تعَمَّق جرح
بعد الجرح …لابد الصلح
الْبَنِي آدم أصله غَرُور
فاكر كُونُه بِه بِيدُور
خَلِّي لِزَعَلَك طرح وفرح
وقالت سِتِّي كمان وكمان

اترك تعليقاً

زر الذهاب إلى الأعلى