المقالات والسياسه والادب
عينك على ابنك كتبت/د/شيماء صبحى
عشان تحمي ابنك من التحرش الأمر بيعتمد على عوامل كتير ممكن تشوفها غير متعلقة بالموضوع أصلا بس للأسف هي حقيقة وواقعية جدا وليها علاقة وثيقة بثقة ابنك في نفسه وشجاعته على مواجهة الموقف الصعبة ومدى ثقته وقربه ومشاركته ليك.
طبعا والله في المقام الأول أنصح بزرع الدين في نفوس الأبناء اه كلنا مستورين بستر الله وكلنا بنجاهد نفسنا لكن مش معني كدة ان الواحد يقصر في النقطة دي لو مش عشان نفسك فعشان عيالك لازم تفهمهم يعني ايه دين ويعني ايه حلال وحرام ولازم يكون ليهم معلم او معلمة قرآن تحت بصرك ونظرك زي ما يكون ليهم مدرب سباحة ومعلم لغات ولازم تحرص قدر المستطاع انك تصلي في المسجد وتاخده معاك ولو ما قدرتش يبقى تصلي في البيت جماعة مع اولادك زرع البوصلة داخل الأولاد مهمة جدا وهتنفعهم في أوقات كتير لوحدهم في مراحل كتير من الطفولة حتى الشيخوخة ولو الدنيا لعبت بيهم شوية هيبقى عندهم جواهم بوصلة مهمة عارفين بيها الحلال والحرام والصح والغلط.
ابنك وبنتك لازم يحبوك ويحترموك ولازم تعرف ان الأقوال مالهاش تأثير على قدر الأفعال فلازم دايما تحاول تكون قدوة ليهم بالفعل قبل القول ما ينفعش تقولهم صلوا وانت ما بتركعهاش قدامهم ما ينفعش تقوله ما تشربش سجاير وانت بتشرب طول اليوم قدامه ما ينفعش تقوله ما تفتحش فيديوهات قليلة الادب وانت لسة اول امبارح كنت فرح عمه عمال تتمايل وترقص مع رقاصة عريانة ملط هتقولي ده ايه علاقته بالتحرش هتفهم في الاخر والله ان الصورة بتكمل بعضها.
حاول دايما التربية تكون نظرية وعملية في نفس الوقت يعني ما تبقاش بتربي في عالم المدينة الفاضلة وفاصلهم عن الحياة الفعلية وما بتتكلموش فيها وفي اللي حصل في يومهم وفي المدرسة والنادي والدرس والشارع ومع أصحابه لازم يحس ان تربيتك up to date ومواكبة لعصره وزمانه مش عفا عليها الزمن وبيحفظوها وبس.
ابنك وبنتك في عينك وعقلك وقلبك ولازم تركز معاهم بحواسك كلها وتحط خبراتك وعلمك ولغاتك وصياعتك وقوتك انك تحافظ عليهم هم اهم حاجة في حياتك سواء ام او اب وبيزيد الأدوار بجنس الطفل يعني لو بنت فالأم دورها اكبر لو ولد فدور الاب معاه اكبر وهو الحقيقي اهم من قعدتك مع أصحابك ومن شغلك ومن سهرتك مع صحباتك لازم تصاحبوهم وتشاركوهم مشاركة فعلية في وقت شغلك ووقت خروجك مع أصحابك ووقت كوافيرك تاخدي بنتك ووقت حل المشاكل تاخده لازم تشاركو اولادكم مشاركة فعلية حقيقة عشان يبقى ده الطبيعي بتاعكم.
لازم تتدرج منذ الطفولة في رفع وعي الطفل مرورا بكونه صبي مرورا بمرحلة البلوغ وتتعامل مع عقله بشكل واعي الطفل بيكون عايز يفهم وعايز معلومة ما تقولش ده صغير وهيفهم ايه ف الوقت الحالي عقل الطفل لا يستهان به واستجابته ممكن تبقى اسرع منك انت شخصيا بس انت مش واخد بالك فلازم تتدرج في كل الأمور والمعلومات والخبرات بشكل دايم وحقيقي يحترم عقله وسنه بما فيهم الملعومات الجنسية.
إياك ثم إياك ثم إياك انك تدي ابنك او تعوده يكون معاه تليفون خاص بيه والله يا اخوانا ده اكبر بلوة حاليا وكل واحد وحسب رؤيته لكن عامة لا انصح بتخصيص تليفون للطفل قبل سن ال ١٦ سنة على اي حال ممكن تكتفي بتليفون عادي او ساعة ذكية .
عينك على اولادك في التجمعات العائلية والمناسبات والأفراح وخاصة في الاختلاط بين الجنسين حتى لو أطفال لو انت واثق في تربية ابنك فأنت ما تعرفش عيال الآخرين ولا واصلين فين لازم تحلل تفاعله بشكل دايم وتعرف هو متفاعل ولا منطوي ولا حركي اكثر وبيتعامل مع مين اكثر وبيلعبوا ايه وبيقوله ايه وايه اهتمامه بالجنس الاخر وشكله ومنجذب لايه وبيتكلم ولا واخد ركن وواثق من نفسه ولا خجول ومكسوف حسب رؤيتك هتقدر تتطور من ده وتحسنه وتشتغل عليه وتوجهه.
لازم تحترم ابنك وتقدره وتقعده في مجالس الرجال وكذلك البنت ما ينفعش تهينه ما ينفعش تهز ثقته بنفسه ما ينفعش تشتمه ما ينفعش تقلل منه قدام الناس لازم دايما تبقى فخور بيه وموصله الشعور والإحساس ده حسسه دايما ان رأيه مهم ما تربيهوش ع الخوف فقط عزز عنده الحب والاحترام والتقدير وأتعامل معاه كراجل كبير هتلاقيه راجل كبير في عمر صغير.
ما تسمحش لأحد كان ولو كان أبوك او امك او عمك او خالتك او اخوانك او اي مخلوق انه يكسر ابنك او يقلل منه او يجعله مضحكة القعدة او يسخر منه او يمد ايده عليه ولو بهزار او يطلق عليه اي لقب فيه حط او اهانه او قلة تقدير او احترام منه او انه يطلعه برة في وجودك او يحسس الطفل ان نفوذه اقوى من نفوذك او اهم من نفوذك ما ينفعش ده يحصل باي حال من الأحوال الطفل او الابن او الابنة في وجودك لازم يحس انه محمي بدرجة تامة وعليه دايرة قوية تدفع عنه اي أذى مادي او معنوي لو ابنك فقد الثقة في الدايرة دي بالسلامة.
