أخبارالسياسة والمقالات
فن الرسايل “سد النهضة”
بقلم الإعلامي/ يوحنا عزمي
سامح شكري يصرح ..
المليء الثاني لسد النهضة لن يؤثر على مصالحنا ولدينا رصيد أمن في بحيرة السد العالي!!
عزيزي المواطن المصري الطيب الجدع ..
– حضرتك اتخضيت من التصريح ده ؟
اتخضيت ليه ان شاء الله ؟
– بص ، لو عندك بلطجي ساكن في أول الشارع وأنت ساكن في أخره ، وعايز تبعت رسايل هنا وهناك بتعمل ايه ؟
هقولك أنا ، بتروح للبلطجي تقوله أمن بيتي ده خط أحمر وهترجع بيتك تقولهم ماتقلقوش مفيش أي تهديد وممكن كمان تقولهم مفيش بلطجي للطمأنه ، وبعدها بتقعد مع نفسك وبتشوف كذا سيناريو للتعامل مع البلطجي ، وتحط كل الإحتمالات والخطط ، حتى تفكيرك ده مش بتعرضه على أهل البيت بتاعك ، مش قلة ثقه فيهم إنها للطمأنه برضه .
– يعني إيه الكلام ده ؟
يعني يابني ده فن اسمه الرسايل ، الرساله بتختلف في مضمونها ومفرداتها ولهجتها حسب هي رايحة لمين ، رسالة سامح شكري لينا إحنا طمأنه لكنها ملهاش علاقه برسايلنا لأثيوبيا ولا رسايلنا للي وراها ، ولا برضه لها علاقه بسيناريوهات الدولة للتعامل مع سد النهضة .
– طب هو إحنا فعلا عندنا مخزون أمن في بحيرة السد العالي يخلينا منتأثرش أوي ؟
أه عندنا بس مش معنى كده إننا هنفرط في مياه النيل أو هنسيب أثيوبيا تملى السد من طرف واحد.
– أزيدك من الشعر بيت ؟
إحنا عندنا مياة جوفية تكفينا عشرات السنين لكن المياه الجوفية دي إرث للأحفاد وأحفاد الأحفاد ، يعني مش بنحطها في اعتبارنا وإحنا بنتعامل مع سد النهضة ، مياه النيل اللي بتجيلنا هي حصة سنوية من قديم الأزل لكن المياة الجوفيه هي التركه اللي استلمناها من أجدادنا عشان نزودها ونسلمها لأحفادنا.
– إحنا عندنا بحرين أحمر ومتوسط بطول أكتر من 2000 كيلو ولازم مستقبلا هنتوسع في محطات تحلية مياة البحر مياه البحر مابتنقصش والبحار واصله بالمحيطات وانت بتغرف منها براحتك ، يعني أوبن بوفيه ، وبرضة مش معناها إننا هنفرط في مياه النيل ، إنما حتى يوم ماتجيلنا حصتنا كاملة من مياه النيل فهي حصة أصبحت لا تكفي ل 100 مليون نسمة ، كانت بتكفى زمان لما كنا 20 و 50 مليون لكننا حاليا بنصنف إننا دولة عندها فقر مائي ، يعني في كل الأحوال لازم نتوسع في تحلية مياة البحر .
أتمنى تكون الفكرة واضحه والناس تفهم إن مصر اللي مافرطتش في حباية رمل مش هتفرط في نقطة مياه وإن سامح شكري هو لسان عبد الفتاح السيسي اللي قال إن مياه النيل خط أحمر .
نقطة أخيره للتوضيح ، يعني إيه طمأنه للشعب وليه ؟
عشان المياه أمن قومي وبتسبق في أهميتها كل حاجه عند المواطن ، انت متخيل مثلا إيه اللي ممكن يحصل لو استقر في وجدان مليون مواطن بس إن مياه النيل هتنقص ومش هنلاقي مياه نشرب ؟
متخيل رد الفعل هيكون ايه ؟
متخيل الناس اللي مش فاهمه وخايفه ممكن تعمل ايه ؟
لا والله مانت متخيل ولا فاهم ، طب هبسطهالك ، طلع بس إشاعة إنه مصر مش هيكون فيها بنزين بعد 3 أيام أو بعد شهر وخلي الإشاعه دي تنتشر وتستقر في وجدان مليون مواطن ، وساعتها قابل وقعد معازيمك ، وبالمناسبة المياه أهم وأخطر مليون مره من البنزين ، وضحت يا مولانا.
تابعنا على
