فن الروقان… مش ضعف دي قوة ناعمة بتغيّر حياتك

فن الروقان… مش ضعف دي قوة ناعمة بتغيّر حياتك

كتبت/ د/ شيماء صبحي 

“ليس الشديد بالصرعة، إنما الشديد الذي يملك نفسه عند الغضب”

الجملة دي لو فهمناها صح… هتغيّر طريقة تعاملنا مع نفسنا ومع الناس تمامًا.

إحنا اتربينا إن القوة هي الصوت العالي، الرد السريع، والانفعال اللي يثبت إننا “مش ضعاف”…

بس الحقيقة؟

القوة الحقيقية هي إنك تبقى قادر تمسك نفسك وقت ما تكون مولّع من جواك.

فن الروقان مش إنك ما تغضبش…

لا، ده طبيعي جدًا

الغضب شعور إنساني زي الفرح والحزن

لكن الفرق بين شخص ناضج وشخص مندفع…

إن الأول بيحس بالغضب، والتاني بيغرق فيه.

الروقان يعني:

إنك تبقى شايف اللي بيحصل… بس مش بتتسحب له

حاسس… بس مش متحكم فيك الإحساس

متضايق… بس عارف تختار رد فعلك

فيه ناس كتير فاكرة إن الروقان ضعف…

وإن اللي بيسكت أو بيهدي هو “مكسور”

لكن الحقيقة إن أصعب حاجة مش إنك ترد…

أصعب حاجة إنك تتحكم في نفسك وانت قادر ترد

لما تتعلمي إدارة غضبك صح:

هتتكلمي بثقة… مش بانفعال

هتعرفي تختاري كلامك… بدل ما الكلام يختارك

هتحافظي على طاقتك… بدل ما تتسحب منك في خناقات مالهاش لازمة

هتبقي شايفة الصورة كاملة… مش بس اللحظة اللي مستفزاكي

وهتحسي بسيطرة حقيقية على حياتك… مش إنك ضحية لمشاعرك

طيب نعمل ده إزاي؟

خلينا نكون واقعيين… محدش بيهدى بكبسة زر

بس فيه خطوات بسيطة لو اتدربتي عليها، هتفرق جدًا:

1. وقفة صغيرة قبل أي رد

أول ما تحسي إنك هتنفجري… اسكتي لحظة

حتى لو 10 ثواني

اللحظة دي بتفصل بين “رد فعل” و”قرار”

2. اسألي نفسك: أنا زعلانة من إيه بجد؟

كتير بنغضب على حاجات سطحية… لكن السبب الحقيقي أعمق

إحساس بالإهمال، عدم تقدير، خوف، أو ضغط

لما تفهمي السبب… ردك هيبقى أهدى وأنضج

3. اختاري أسلوبك مش صوتك

مش لازم تعلي صوتك عشان توصلي

الكلام الهادي الواضح بيوصل أكتر بكتير من العصبية

4. مش كل حاجة تستاهل رد

فيه مواقف أحسن رد ليها هو التجاهل

مش ضعف… لكن حفاظ على نفسك

5. ادي لنفسك حق تهدى

مش لازم تحلي كل حاجة وانت متعصبة

خدي وقتك… وبعدها ارجعي اتكلمي

أهم نقطة بقى…

الروقان مش معناه تكتمي جواكي

ولا تكسري نفسك عشان ترضي حد

لكن معناه إنك تعبّري… بطريقة ما تجرحكيش ولا تجرح اللي قدامك

الإنسان الهادي مش بارد…

ده شخص قوي… عارف إمتى يتكلم، وإمتى يسكت، وإمتى يعدّي

وفي الآخر…

مش المطلوب إنك تبقي مثالية

لكن المطلوب إنك كل مرة تتعصبي فيها… تبقي أهدى شوية عن اللي قبلها

لأن الروقان… مش صفة

ده تدريب

ومهارة

وأسلوب حياة