قلبك المرن مش بطاقة شحن ببلاش
قلبك المرن مش بطاقة شحن ببلاش
كتبت/ د/شيماء صبحي
فيه ناس بتفتكر إن مرونة القلب يعني إنك تفضل موجود عشانهم طول الوقت، حتى لو ده على حساب نفسك.
قلبك المرن بيخليك تسامح بسرعة، تدي فرصة ورا فرصة، تلغي وجودك وتنسي نفسك عشان حد تاني يبقى مبسوط.
بس هنا المشكلة…
المرونة دي لو ما كانش ليها حدود، بتتحول لاستنزاف.
بتلاقي نفسك بتدي من غير ما تاخد، بتسكت عشان ما تزعلش، وبتتحمل فوق طاقتك عشان العلاقة تكمل.
وطبيعي مع الوقت تحس إنك اتلغيت… بقيت “وجودك مجانا”!
القلب المرن قوة، بس القوة دي لازم تتوجّه صح:
مرن مع الناس اللي تستاهل.
مرن مع نفسك لما تغلط.
مرن في العطاء… لكن مش في التفريط.
لأن التضحية الحقيقية مش إنك “تختفي” عشان غيرك يعيش، لكن إنك “توازن” بين إنك تحب غيرك وإنك تفضل تحب نفسك برضه.
اسأل نفسك:
هو أنا بدي بقلبي عشان فعلاً بحب؟
ولا عشان خايف أخسر؟
لو الإجابة التانية… يبقى محتاج توقف، تراجع نفسك، وتبدأ تبني حدود واضحة.
افتكر دايمًا:
مرونة قلبك مش معناه إنك تستسلم.
ولا إنك تتنازل لدرجة تذوب وتضيع.
دي معناه إنك عندك قدرة تستوعب وتحتوي، لكن كمان عندك ذكاء تختار إزاي ومين يستاهل.
خلي مرونتك هدية، مش استغلال.
وخلي وجودك غالي… مش مجانًا.
خطوات تخلي مرونتك قوة مش ضعف:
1️⃣ اسمع نفسك الأول
قبل ما تقول “آه” أو “حاضر”، اسأل نفسك: هو أنا قادر فعلاً ولا لأ؟
2️⃣ حط حدود واضحة
يعني تقول “مقدرش” أو “مش هينفع” من غير تأنيب ضمير.
3️⃣ فرّق بين التسامح والتهاون
تسامح عشان ترتاح وتكمل، لكن ما تكررش نفس الغلطة وتسيب غيرك يستغل طيبتك.
4️⃣ ادّي على قد طاقتك
ما تديش من فراغ. العطاء الحقيقي لازم يبدأ من وفرة مش من نقص.
5️⃣ ذكّر نفسك إنك غالي
وجودك مش مجاني، وجودك قيمة. أي حد ما يعرفش قيمتك، ما يستاهلش مرونتك.
خلي مرونتك هدية للي يقدّرها، مش فرصة للي يستغلها.
