المقالات والسياسه والادب
قول لأ كتبت / شمس فتحى
قول لأ
في ناس مصلحتها إنك تفضل
“طيب زيادة عن اللزوم”.
هيحبوك طول ما أنت
الباب المفتوح 24 ساعة
هيحبوك طول ما وشك بيضحك
حتى وانت من جواك متكسر
هيحبوك طول ما بتبلع هزارهم
البارد وبتقول عادي
هيحبوك طول ما أنت اللي بتدي
ومش بتطلب
هيحبوك طول ما أنت متعرفش عنهم حاجة عشان متكشفهم
هيحبوك طول ما بتدي إحترام
وبتاخد قلة قيمة وساكت
هيحبوك طول ما بتقبل الذل
مقابل شوية إهتمام
بيحبوك؟ لأ
هما بيحبوا النسخة بتاعتك
اللي مبتقولش “لأ”
لكن في اليوم اللي هتقف فيه وتقول:
“لأ ده مش مناسب ليا”
“لأ ده مش إحترامى”
“لأ مش هكمل كده”
في اليوم ده وشهم هيتقلب
الوش الحلو هيقع
وهتشوف معاملة باردة
متلجة 180 درجة
وده المطلوب
مرحلة وضع الحدود مؤلمة؟ اه
لأنها بتكشف وبتفرز وبتطرد
ناس كتير هتقع من حياتك
بسرعة الصاروخ
بس دي تمن السلام النفسي
ده تمن إنك تحترم نفسك
عشان الناس تحترمك
اللي مش هيستحمل حدودك
مكنش يستاهل وجودك من الأول
خليك تقيل ويخليك غالي قول “لأ”
