كتبت/د/شيماء صبحي
يا ما ناس بتحب بجد، وتدي من قلبها بدون حساب.
تدخل علاقه وهي شايله أمل إن دي هتكون “الأخيرة”، وتعيش حلم إن الحبيب ده هو الونس والسند. بس في لحظة صدق مع نفسك تكتشف إنك خسرت كتير: راحتك، وقتك، ثقتك، وأحيانًا نفسك. وساعتها تقول من جواك: “اه فعلاً أنا حبيتك.. بس الحمد لله إني خسرتك”.
وجع الحب
الوجع مش بس إنك تبعد عن اللي بتحبه، الوجع الحقيقي إنك تلاقي نفسك اتأذيت من اللي كنت شايفه أمان.
وجع الخيانة بيكسر.
وجع الإهمال بيموت بالبطيء.
وجع الوعود الكدابة يخليك تفقد ثقتك.
بس الصعب أكتر إنك تلاقي نفسك بقيت غريب عن نفسك، مش عارف أنت مين بعد ما اتعلقت بحد أكل روحك.
استحمال البُعد
البُعد مش سهل، أول أيامه بتبقى نار، دماغك مليانة ذكريات، وقلبك بيقاوم يدي فرصة تاني.
لكن مع الوقت:
بتتعلم تصحى من غير ما تدور على رسالة منه.
بتعرف تمشي في الشارع من غير ما تدور على ملامحه وسط الناس.
وبتفهم إن البُعد أحيانًا بيكون العلاج مش العقاب.
الإيجابيات
1. استرجاع نفسك: بترجع تعرف أنت مين من غيره.
2. الوعي: بتتعلم إزاي تختار صح وتفهم العِبر.
3. القوة: البُعد بيقويك ويخليك أقوى من زمان.
4. الحرية: مش مربوط بحد مش مقدرك.
السلبيات
1. الذكريات الموجعة اللي بتفضل تلاحقك فترة.
2. الوحدة اللي ساعات بتوجع أكتر من العلاقة نفسها.
3. الخوف من تكرار التجربة فتقفل قلبك زيادة عن اللزوم.
خطوات عملية وحلول
1. اعترف بوجعك: متكتمش، قول لنفسك “أنا موجوع” واعترف إنك محتاج وقت.
2-اقطع كل وسايل التواصل: البُعد الحقيقي مش هييجي طول ما في باب مفتوح.
3. اشتغل على نفسك: رياضة، تعلم، شغل.. أي حاجة تشغلك عن الحزن.
4. أكتب وجعك: القلم بيشيل عن القلب كتير.
5. وسع دايرة حياتك: أصحاب، أهل، هوايات.. عشان تحس إن فيه حياة بعده.
6. غذي قلبك بإيمانك: لما تفتكر إن ربنا بيشيل من طريقك اللي مش خير ليك، هتعرف تقول “الحمد لله إني خسرتك” بصدق.
الخلاصة
الحب مش غلط، الغلط إنك تدي قلبك كله لحد ميستاهلش.
والخساره مش نهاية، دي بداية جديدة لنفسك اللي نسيتها زمان.
الوجع هيعدي، والجرح هيلتئم، وساعتها هتبص ورا وتقول:
“اه أنا حبيتك.. بس الحمد لله إني خسرتك، لأن خسارتك كانت مكسب ليا.”
