لما الكلام يعجز ربنا فاهم من غير شرح
لما الكلام يعجز ربنا فاهم من غير شرح
كتبت/د/ شيماء صبحي
في أوقات كتير بنوصل لمرحلة غريبة
مرحلة إنك تبقى تعبان… ومش عارف تقول ليه
مخنوق… ومفيش كلمة طالعة صح
حاسس إن جواك وجع كبير، بس لو حد سألك: مالك؟
ترد وتقول: مش عارف
مش عارف تشرح
مش عارف تشتكي
مش عارف حتى تعيط
الهم بقى تقيل
والكلام خفيف عليه
فما يطلعش
ساعتها ما تحاولش تجمّل الكلام
ولا تدور على جُمل كبيرة
ولا تفسّر وجعك للناس
لأن في وجع… ما يتشرحش
وفي حزن… ما يتقالش
وفي خنقة… لو اتكلمت عنها تزيد
في اللحظة دي بالذات
افتكر إن ربنا مش محتاج شرح
ولا تقرير
ولا تفاصيل
ربنا شايف قلبك
سامع سكوتك
فاهم دمعتك اللي محبوسة
وعارف الوجع اللي انت مش قادر تسميه
علشان كده ربنا قال:
﴿ رَبَّنَا إِنَّكَ تَعْلَمُ مَا نُخْفِي وَمَا نُعْلِنُ ﴾
يعني إيه؟
يعني هو عارف اللي جوه صدرك
وعارف اللي خايف تقوله
وعارف اللي مستخبي حتى عنك إنت
عارف خوفك اللي بتضحك قدامه
وعارف ضعفك اللي بتداريه بالقوة
وعارف الدعوة اللي مش قادر تنطقها
وعارف الأمل اللي شبه مات
وعارف الصبر اللي خلاص على آخره
إنت مش محتاج تكون قوي طول الوقت
ولا محتاج تبرر وجعك
ولا تثبت إنك تعبان فعلاً
ولا تشرح لحد إنك حاولت كتير
ربنا شاف محاولاتك
شاف سكاتك
شاف صبرك
شاف اللي اتاخد منك غصب
واللي استحملت فيه أكتر من طاقتك
لما تعجز عن الكلام
قولها من قلبك وبس:
يا رب… إنت عارف
الكلمة دي لوحدها دعاء
لوحدها راحة
لوحدها اعتراف إنك سلمت الحمل
وحطيته في إيد اللي يقدر عليه
مش كل وجع محتاج حكاية
مش كل دمعة محتاجة شهود
مش كل هم لازم يتقال
أحيانًا أقوى حاجة تعملها
إنك تسكت… وتسيب ربنا يتكلم عنك
يدبّر
يحن
يجبر
ويفهمك من غير ولا كلمة
وصدقني
اللي فاهم الوجع من غير شرح
هو الوحيد اللي بيعرف يشيله عنك صح.
