لما النفس تتعب الجسد يدفع الفاتورة
لما النفس تتعب الجسد يدفع الفاتورة
كتبت/ د/شيماء صبحي
فيه عقاب قاسي أوي في الحياة ناس كتير متاخدش بالها منه غير لما يقع عليها فجأة
مش عقاب من حد
ولا من الدنيا
ده عقاب من جسمك نفسه…
لما يقرر إنه مش هيستحمل أكتر من كده.
تلاقي نفسك في فترة قصيرة جدًا
يا تخنت تخن مش شبهك
علشان بتطلع كل عصبيتك وكسرتك وحزنك في الأكل
الأكل بقى المسكن
واللقمة بقت حضن
وأي حاجة تسكت الوجع وخلاص
أو العكس
تخس خُسّان يخوف
علشان بقى مفيش نفس
ولا شهية
ولا رغبة حتى في لقمة
الاكتئاب قفل نفسك من الدنيا كلها
حتى من أبسط حق ليك… الأكل.
وفجأة
تبدأ تشوف حاجات غريبة في جسمك
تعب مش مفهوم
إرهاق على أقل مجهود
وجع في كل حتة
صداع مزمن
معدة بايظة
قولون مش سايبك
دقات قلب مش منتظمة
تلف على دكاترة
تحاليل
أشعة
كشف ورا كشف
وفي الآخر تلاقي الدكتور بيقولك الجملة اللي بتوجع أكتر من المرض نفسه:
“تحاليلك كويسة… بس حالتك النفسية تعبانة”
“مش هتخف غير لما نفسيتك تتحسن”
ساعتها تفهم
إن جسمك مش بيخونك
جسمك بيصرخ
بيقولك:
كفاية بقى
أنا تعبت من الشيل
من الكتمان
من الضغط
من إنك مكبر دماغك على حسابي.
ومش بس كده
كتير يوصل بيه الحال لأمراض أكبر
ضغط
سكر
مناعة واقعة
اضطرابات هرمونات
وجسم ينهار حتة حتة
علشان نفس اتحملت أكتر من طاقتها.
كأن جسمك قرر يفوقك
بس بطريقة موجعة
طريقة تقولك:
مفيش حد
ولا علاقة
ولا شغل
ولا حكاية
تستاهل إنك تدمر صحتك علشانها.
وكأن جسمك بيقولك بوضوح:
الناس اللي انت تعبان علشانهم
واللي مكتئب بسببهم
لو كانوا بيحبوك بجد
مكانوش سابوك توصل لكده
مكانوش سابوك تسيب نفسك
ولا تنهار
ولا تضيع.
وبيفكرك بحاجة إحنا دايمًا بننساها
إن صحتك مش رفاهية
ولا حاجة مؤجلة
ولا بند يتحط في آخر القائمة
صحتك هي رأس مالك الحقيقي
هي الحاجة الوحيدة اللي لو راحت
مش هتعرف تعوضها بسهولة.
وبيفهمك الحقيقة اللي محدش بيحب يسمعها:
إنك لو ضيعت صحتك
هتتحول غصب عنك لشخص عاجز
محتاج
متعلق
وغالبًا… حِمل
حتى على أقرب الناس ليك.
علشان كده
أوعى تستهين بوجعك النفسي
ولا تقول “هتعدي” وانت بتنهار
ولا تكمل في علاقة أو وضع بيكسر فيك كل يوم
وتستغرب بعد كده ليه جسمك وقع.
اسمع لجسمك
اهتم بنفسك
عالج وجعك
اطلب مساعدة
سيب اللي بيستنزفك
وافتكر دايمًا:
مفيش حاجة في الدنيا تستاهل
إنك تخسر نفسك علشانها.
