ليبقى كُلٌّ في مكانِهِ يا خَلِّي القلب كتبت/د/شيماء صبحي في يوم من الأيام كنت فاكرة إن الدنيا بسيطة… وإن الحب لما يدخل القلب يغير كل حاجة للأحسن. كنت بقول لنفسي: “يالا يا قلبي… يا أسعد قلب… نملى الدنيا حب في حب… نقوم على الشوق… وننام على الحنين… ونفسر كل الأحلام على إنها بشاير خير… ونبقى غنوة للعاشقين.” كنت فاكرة إن الضحكة هتفضل ضحكة… وإن الإيد اللي اتمسكت بحب عمرها ما هتسيب… وإن الوعود اللي اتقالت تحت نور القمر مش ممكن يجي يوم وتتنسى. كنا بنرسم بكرة كأنه ملكنا… نبني بيوت من الكلام الحلو… ونفرش الطريق ورد وأماني. كل حاجة كانت بتضحك… الأغاني كانت ليها معنى… والشوارع كانت أوسع… والدنيا كلها كانت أخف. لكن محدش قال لنا إن بعض الأحلام بتتولد علشان تتكسر… وإن بعض الناس بتيجي حياتنا علشان تعلمنا الوجع أكتر ما تعلمنا الحب. وفجأة… لقيت الأغاني اللي كانت بتفرحني بقت بتوجعني. والأماكن اللي كانت شاهدة على الضحك بقت مليانة صمت. والكلام اللي كان بيدفي القلب بقى مجرد ذكرى تقيلة على الروح. أصعب حاجة مش إن الحب يخلص… أصعب حاجة إنك تكتشف إنك كنت بتحارب لوحدك. إنك كنت شايل العلاقة فوق كتفك… بتصلح… وتسامح… وتبرر… وتدي فرص… وفي الآخر تلاقي نفسك واقف قدام خيبة كبيرة. خيبة إن الشخص اللي كنت فاكره وطن… طلع مجرد محطة. وإن الأمان اللي كنت حاسه… كان وهم جميل بس عمره ما كان حقيقة. الخذلان مش وجع قلب وبس… الخذلان بيكسر صورة كاملة جواك. بيخليك تشك في كل كلمة حلوة سمعتها… وفي كل وعد صدقته… وفي كل لحظة فرحت بيها. ساعات بنفتكر إننا زعلانين على شخص… لكن الحقيقة إننا زعلانين على نفسنا. على القلب اللي صدق. على العمر اللي اتحط في المكان الغلط. على الأحلام اللي اتبنت فوق أرض مهزوزة. وبعد ما كان القلب بيغني… بقى بيسكت. وبعد ما كان بيجري ناحية الحلم… بقى خايف يحلم من جديد. ويمكن أكبر وجع… إنك تفضل فاكر تفاصيل حد نسيك بسهولة. تفضل شايل مكانه جواك… وهو نقلك من حياته كأنك ماكنتش فيها يوم. عشان كده… مبقاش عندي طلبات كتير من الدنيا. كل اللي بقيت أتمناه: إن كل شيء يبقى في مكانه. الصدق مع الصادقين… والحب مع اللي يعرف قيمة الحب… والوفاء مع اللي يستحق الوفاء… والقلوب اللي كسرت غيرها… تبعد عن القلوب الطيبة. ويبقى كلٌّ في مكانِهِ… ويبقى القلب اللي اتوجع… عارف إنه كان نضيف… وإن خسارته لأي حد ما تنقصش من قيمته. لأن بعض النهايات مؤلمة… لكنها أرحم بكتير من حياة كاملة مع شخص لا يعرف معنى الحب. ويبقى السؤال الحزين مش ليه ساب؟ لكن ليه وعد من البداية
