أدب وثقافه
” محلك سر “
الشاعر ابو الخير بدر
– بتحبني
بحبك موت
– ولما تموت تسبني لمين ؟
خلاص أسف بموت فيكي
– شيفني تابوت تموت فيه
– مدام الحب عندك موت
– أشوف واحد يعيش ليا
يابنت الايه يا مجنونة
بقلنا سنين بنتواعد
ونتقابل ونتسامر
ونلعب حجلة أو أولي
ومن أولي إلي الجامعة
بقلنا سنين راحين جايين
بنلعب تحت بير سلم
وأحيانا علي البسطة
وفوق السطح في العشة
كرشنا البط وفرشنا
عيدان القش
وكان ناقص نبيض بضتين
مفيش مسرح
ولا دار عرض للسينما
ح تنكر إني بحجزلك
في أخر صف في البلكون
وتبقي لبانة في إيديا
عجينة مشكلك ليا
يا نكرة الخير ياجنيه
قدرتي إزاي تقوليها !
– طب أعمل إيه
– بقلنا سنين محلك سر
– وكل اللي يدور بينا م أصبح سر
– وشيئ معروف لعاد خافي
– ولافي كسوف
– مفيش مرة يجي ف بالك
– تخبط يوم علي بابنا ؟
– وتعمل فيها واد منظر
– وتتمنظر وتطلبني ؟
– ابويا كل يوم طالع
– في ايده عريس
– وامي كل يوم صبحة
– تقوللي تعيس
– يشوفة القرش يستغفر
– ويهرب كانه شاف عفريت
– وكل الحارة بصين ليٌ
– ك جرثومة
هتعملي فيها كلثومة
وهتغني بعيد عنك !
أبويا قال ….
قالت أمي …..
وكل الحارة سموني ….
ومين تاني كمان قالك ؟
يابت اهدي
خلاص هانت
وطول مافي أمل هتروق
خلاص نازل
قرار جمهوري مستعجل
مفيش خِريج
هيقعد تاني على القهوه
مفيش واحد
تخطي حاجز التلاتين
بدون شقة
وعلي المفتاح ومفروشة
مفيش عانس ولا أرمل
ولا محلوف عليها طلاق
تمد الإيد
ولا واحد بدون وحدة
تكلبش فيه
بيلموا الشمل بين إتنين
بدون تكاليف
هيقضوا خلاص علي الوحدة
هيدوا لكل واد قادر
بدال الوحده يبقوا اتنين
ولو فاجر يجوز اكتر
ورأى الشرع دا أوجب
وخارج جيبة بيت المال
و بيوزع
علي الصايعين
وع الضايعين
وع العاله إللي مش لقين
ف جِيبي شهادة الجامعة
عشان الصبح هنقدم
و يصبنا الدور
– يصيبك م أصاب مجنون
– في حارة يزقلوك بالطوب
– في عصر خليفة م الخلفاء؟
– يكونشي في ملاك هابط
– علي الأرض وبيديرها ؟
– يكون يوم القيامة قام
– ومش عارفين
– دخلنا في حسبة الخمسين
– ولسة ناوي تتمعشق
– وباقي كام عن الستين ؟
– بقينا معاش بدون تعيين !
– خلاص خارجين من الخدمة
– بدون هدمة
– ولا مأوي ولا تعيين
– خلاص خارجين من الدنيا
– بدون أسباب ولا تعليل
– انا بحلم
– بفستان الزفاف والتل !
– يلفوني في توب أبيض
– و زي الفل ؟
– بدال م الورد يجي كادوه
– في عيد الحب
– يكون حزمة علي الشاهد
– يقول لي وداع !
– بدال دُخله تكون خرجه
– إلهي يمسكوك بليل
– في ساعة المنع
– ويطلع عندك المخفي اللي قالوا عليه
– وتبقي في حجر مستنظر
– متعرف ليه
– تعيش أجرب كما الموبوء
– مابين الناس
– تموت أجرب
– بدون متحس أو توعى
تابعنا على
