مصر تقود العالم بحفل افتتاح المتحف الكبير

مصر تقود العالم بحفل افتتاح المتحف الكبير

صفاء مصطفى الكنانة نيوز 

بعد انتظار طويل وشغل دام سنين، تحقق حلم كل المصريين وتم افتتاح المتحف المصري الكبير في ليلة مميزة أظهرت حضارة مصر بشكل عالمي الحفل كان مليان لقطات فنية رائعة شدت الانتباه وأظهرت مصر في أبهى صورة قدام العالم

أول وأقوى لحظة كانت عرض المقطوعة السيمفونية اللي اتقدمت لايف بين فرق موسيقية في البرازيل وفرنسا وأمريكا واليابان بالتزامن مع الأوركسترا المصرية على أرض الجيزة اللحظة دي كانت رسالة واضحة إن مصر بتقود سيمفونية حضارية للعالم كله

بعدها العروض اتنوعت واتحفت الجمهور من كل أنحاء العالم كان فيه السوبرانو المصرية والأغنية النوبية والطفل آسر وفِرق موسيقية وأوبرالية من كل القارات وأبرز لقطة كانت للمسلات المصرية اللي اتعرضت كرمز لوجود الحضارة المصرية في عواصم العالم زي باريس ولندن وروما واسطنبول وكمان رسالة ضمنية للآثار المسروقة اللي لازم ترجع لمصر

كلمة الفنانة شيريهان كانت ليها أهمية كبيرة لأنها حكت قصة الأهرامات وعلاقتها بنجوم حزام أورايون ووضحّت أن المسلات كانت بتنير المدن المصرية من زمان القصة دي أعادت تعريف أسرار الحضارة المصرية بطريقة جديدة وجذبت الانتباه

الألعاب النارية كانت مبهرة جدًا ومرتبة بشكل يخلي السما نفسها كأنها بتغني مع الموسيقى على المسرح ولحظة امتزاج الترانيم القبطية بالإنشاد الإسلامي كانت مؤثرة جدًا ووصفت رسالة الوحدة بين كل المصريين رغم اختلاف الديانات والثقافات

الأغنية النوبية كانت برضه من أجمل اللقطات لأنها عبّرت عن الهوية المصرية وعلاقتها بالنيل وحضارة مصر القديمة

طبعًا فيه بعض الأخطاء الفنية في التصوير زي كاميرات مهزوزة وزوايا غير متقنة وأحيانًا الموسيقى كانت أعلى من الكلام وبعض اللقطات ظهر عليها شعار “Shutter Stock” بعلامة مائية لكن رغم كل ده الاحتفالية كانت جميلة وراقية ومبهرة

الناس كتير قارنوا بين الحفل ده وموكب نقل المومياوات الملكية اللي كان استعراضي ومتحرك ومعظم مشاهدها مسجلة أما الافتتاح ده كان رسمي أكثر وبروتوكولي ثقافي موجه للوفود الدبلوماسية والسياح مع التركيز على الموسيقى العالمية والأوركسترا والعروض التقنية الحديثة

الحدث رفع سقف التوقعات وخلّى المصريين فخورين جدًا ووضح أن مصر قادرة على تقديم أفضل العروض للعالم وأثبتت الحضارة المصرية قدرتها على الجمع بين الماضي العريق والحاضر المتطور في ليلة واحدة

في النهاية كانت ليلة افتتاح المتحف المصري الكبير حدث تاريخي يخلّد اسم مصر على الساحة العالمية ويجمع الفن، الثقافة، والتاريخ في احتفالية واحدة تستحق أن تُذكر لكل الأجيال