معلومة زراعية اهم رشة للقمح
بقلم م. وجدى نعمان
اهم رشة للقمح
عزيزي المزارع رشة البوتاسيوم بمرحلة النضج اللبني او مثل ما نكول نزول النعمة فعلاً الها تأثير جيد على امتلاء الحبة وزيادة الوزن لأن بهالمرحلة النبات ينقل الغذاء من الورق للسنابل والبوتاسيوم يساعد بهالعملية بشكل كبير.
بس لازم نكون دقيقين بالحچي مو كل حقل يحتاج رش وإذا الزرع نموه قوي والتربة بيها بوتاسيوم كافي ممكن ما تشوف فرق كبير والرش يصير أهم بحالة التعب أو الإجهاد أو ضعف النمو، لذلك دائمًا ننصح بتحليل التربة.
مو شرط ترش مرتين غالباً رشة وحدة بهالمرحلة تكفي إذا كانت الظروف طبيعية وأفضل مادة بهالوقت نترات البوتاسيوم لأن بيها بوتاسيوم ويا نيتروجين سريع الامتصاص يفيد الامتلاء.
وهم نقطة مهمة اغلب المزارعين يغفلون عنها هي أكبر عامل يحدد وزن الحبة مو البوتاسيوم وحده وإنما توفر المي وصحة ورقة العلم والتغذية الزينة من البداية لان البوتاسيوم مجرد عامل مساعد مو المعجزة.
وإذا تريد نتيجة أقوى ممكن تضيف نترات بوتاسيوم ويا الهيومك بالريّة الأخيرة وهاي أحياناً تغنيك حتى عن الرش الورقي.
