نور وسط العتمه
نور وسط العتمه
بقلم تغريدنافع
كلنا بنتعرض لمواقف صعبة في حياتنا. بس أجمل شئ أما تشوف لطف ربنا وعدله وكرمه في التعامل معها.
أنا هحكي لكم موقفين أجمل من بعض حسيت فيهم برحمه ربنا وكرمه وجبره ولطفه وعنايته بيا.
كنت بعاني لمدة أكتر من سبع شهور من ألم فظيع طَير النوم من عيني حرفياً . كشفت كل التخصصات وكلهم على رأي واحد بعد الفحص والتحاليل الكتيرة . أنتِِ أكيد في حاجة تعباكي نفسياً وبيتهيأ لك الألم ده. لدرجة اتنين دكاترة قالوا لي صلي يا مدام حسسوني اني مدخلتش الاسلام. قلت لهم بصلي واقرأ قرآن ومفيش غير استرس الحياة. ايه دخل ده بتعبي انا جيالكم تشخصوا لي مرضي نظراً لفشلهم ردهم انتي زي الفل زودي الجانب الروحاني عندك.
يومها وأنا راجعة البيت قلت يارب أنا هعمل ورد صلاة علي النبي بنية الشفاء من أي داء . داومت بفضل الله على الورد كتير على أد ما أقدر. وخدت قرار إني مش هكشف تاني لاني زهقت محدش عارف يشخص حالتي وعايشةعلى مسكنات كتيرة. مرة واحدة اثناء رابع يوم من الورد اللي مواظبة عليه ربنا ذكرني بدكتور ممتاز اعرفه من سبع عشرة سنه . كان للأسف مش معايا رقمه عملت سيرش عليه وجبت رقمه و روحت له كشفت ماشاء الله عليه من أول مرة قالي انتِ محتاجه تعملي عملية في أسرع وقت اعملي التحاليل دي . روحت من عنده في قمة السعادة إن حد حط إيده على المرض وشخصني صح. وفعلا بعد يومين عملت العملية، وبعد شهرين من العملية بدأت استرد صحتي بالتدريج بعد معاناه قاربت على السنه بفضل الله.
موقف تاني انسانة ظلمتني ظلم بين من ثلاث سنين واذتني أذى كبير . ورغم اني حاولت اخد حقي الا اني حسيت بردوا مخدتوش كامل. وقتها قلت حسبي ونعم والوكيل فقط . والسنين عدت، ونسيت الحكاية. لكني نسيت وما كان الله نسياً. سبحان الله بعد كل المدة دي حصل موقف غريب ربنا حطها في موقف لا تُحسد عليه أمامي . ربنا فضحها وقل قيمتها بشكل عجيب. لدرجة اني واجهتها بظلمها وسط مجموعه من الناس اللي كانت دايماً تمثل المثالية والتدين قدامهم فيهم اللي كان بيصدق تمثيلها وفيهم لأ. كمان قلت لها في وشها ده حقي في الدنيا ربنا شاء ان يرده ولسه باقي حقي هاخده في الآخرة. يومها حسيت ربنا ارضاني بعدله بشكل عجيب فوق ما اتخيل . حسيت بسعادة وكرم وجبر ورد اعتبار غير عادي . تأكدت ان فعلاً” لكم في الحياة قصاص يا أولي الألباب”.
انا حكيت الموقفين دول عشان تدرب عينك تشوف شعاع النور وسط الضلمة . وانك دايما تكون ممتن لربنا . وتعرف مهما ضاقت لازم تفرج ولازم ربنا يعطيك حتي يرضيك . إذا كنت قلبك صافي ومش بتأذي غيرك ومتوكل على ربنا سبحانه وتعالي قبل كل شئ.
