هل في حد في الحياة يستاهل الثقة؟
هل في حد في الحياة يستاهل الثقة؟
كتبت ا. سبيله صبح
سؤال وإن كان بسيط في شكله، لكنه تقيل في معناه. سؤال بيطلع بعد خذلان، أو صدمة، أو موقف هزّ الإيمان في الناس. لما الثقة تتكسر مرة، مش بترجع زي الأول، ولما تتكسر أكتر من مرة، القلب يبتدي يسأل: هو في حد أصلًا يستاهل؟
…. في الحقيقة الثقة مش قرار سهل، ولا هي حاجة ينفع نمنحها لحد من أول وهلة . الثقة رحلة، بتتبني على مواقف كتير، وبعد محن ومنح كتير بنمر بيها، الثقة لازم نفكر مش بس ألف مرة قبل مانمنحها لحد، لكن مليون.
الثقة مش مجرد كلمة… دي تجربة
اللي يستاهل الثقة مش اللي كلامه حلو، ولا وعوده كبيرة، وتيرة، لكن اللي أفعاله ثابتة. الشخص اللي يكون موجود وقت الضيق قبل الفرح، اللي ما يغيرش مواقفه حسب مصلحته، واللي يحترم ضعفك قبل قوتك، الشخص اللي مهما شاف منك ثابت، يتحملك في كل حالاتك، ضعفك، وقوتك، حنانك، قسوتك.
مش كل الناس زي بعض
الخذلان بيخلينا نعمم، وشايفين الكل بعين الغدر والخذلان ، لكن الحقيقة إن الناس درجات. في اللي يخون الثقة، وفي اللي
بيحافظ عليها كأنها أمانة. المشكلة إننا أحيانًا بندي الثقة للي ما يستحقش، ونسحبها من اللي يستاهل فعلًا.
الثقة الكاملة عملة نادرة
مافيش إنسان كامل، وكلنا بنغلط. عشان كده، الثقة المطلقة شبه مستحيلة. لكن في ثقة متوازنة:وهي الثقة الواعية، بيكون أساسها الحذر،
وفيها عقل مع القلب. ثقة ما تلغيش حدودك ولا تلغي عقلك.
أهم ثقة هي الثقة في نفسك
قبل ما تسأل…… مين يستاهل أثق فيه؟
اسأل: هل أنا واثق في إحساسي؟ وفي كل قراراتي؟
لما تثق في نفسك، أي خذلان بيكسر العلاقة، مش هيكسرِك.
اللي يستاهل الثقة يثبت نفسه مع الوقت
الثقة ما تتطلبش، وما تتفرضش، وما تتسرقش. اللي يستاهلها بيكسبها بالصبر، بالصدق، وبالاحترام المستمر. ومع الوقت، الإجابة بتظهر لوحدها.
في النهاية…..
بالتأكيد في ناس تستاهل الثقة، لكن مش كل الناس، ومش بسرعة، ومش على حساب قلبك. خلي ثقتك حكيمة، وعلى قد الأفعال، مش الوعود .
