يا كاتبة الخطوة على جبيني

يا كاتبة الخطوة على جبيني
بقلم: عفاف مسلم علي
وحشتيني.. يا كاتبة الخطوة على جبيني،
يا منشّئة النشأة بين إيدك، يا سهرانة طول ليلك،
وحيرانة بفكر وويل على ولادك.
كبرت وطاير على لساني “إنتي حاضر” يا نن عيني.. وحشتيني.
يا شايلة همّنا وستراني، وماسحة الدمعة ولاقياني.. وحشتيني.
فاكرة وأنا تعبانة؟
شفت صرخة جوه عينك بتقولي: “مالك؟”،
وسمعت دقات قلبك بتقولي: “يا رب يرعاكي”.
حاسة بيكي وإنتي داخلة تحطي إيدك على راسي،
وصوابعك الطاهرة كتبت على جبيني كلام ما يتقراش.. يتحسّ ويتعاش.
وحشتيني..
لو كنت أعرف إن عمري لما يمد، عمرك إنتي كان بيقصر،
كنت هطلب من إلهي إني ما أكبر، وتفضلي ليا مأمن.
كنتي لامّة كل الولاد، وعن فراقك ما في سكات..
وجه يوم الاحتضار، وطالت آهاتك سنين.
قلب بنتك اللي بره حاسس بيكي صارخ وباكي،
وقلب بنتك القريبة حس بيكي ودي حقيقة..
وجارتي رنّت وقالت: “طمنيني، أمك في ضيقة؟”
ما كانش عندي غير البكاء وغير السكات، وراح الباقي.. وآه يا أمي.
بدخل في دارك حاسة بفراقك، ونار حنانك انطفت..
كنت بدخل عارفة مستنياني،
ولو جعانة تحطي ليا ومهنياني، ولو مريضة تداوي فيّا ومهنياني.
تفهمي بيّا إيه من قبل ما أقرّب عليكي،
كانت عنيكي بتقولي “مالك” واللسان ما نطقهاش.
عارفة إني جاية ليكي والحكاية ما أخبّيهاش،
حتى السكات كان بيحكيلك إيه الحقيقة.
فراقك يا أمي كسر ضهري، وطفّى نور أيامي،
وبقيت يتيمة في عزّ كبري، وتاهت في بُعدك أحلامي.
مين بعد منّك يرفع إيديه ويدعيلي من قلبه؟
مين يحسّ بوجعي من غير ما أشتكي همّه؟
الدنيا بعدك بقت غربة، وكل باب بعدك اتقفّل،
والدمع في عيني مابينشفش، وجرح فراقك ما بيتحمل.
أصبح بيتك مهجور.. وهروح لمين؟
ومهما طالت السنين، ليكي بحنّ.



