كتبت/د/شيماء صبحي مباحث الكون وصلت والملف لسه مفتوح فيه ناس لو حد قالهم: “صباح الخير”… يقعدوا أسبوع يحللوا الجملة! هو قالها بسرعة ليه؟ هو كان يقصدني ولا بيجامل؟ هو قال “صباح” بس، ما قالش “صباح الفل”… أكيد زعلان! هو ابتسم بنص بقه… يبقى فيه مصيبة! يا ابني… الراجل يمكن كان مستعجل يجيب عيش! إحنا بقينا عايشين في فيلم تحقيقات. كل كلمة لها خمسين تفسير. وكل نظرة وراها مؤامرة. وكل “تمت المشاهدة” معناها إعلان حرب عالمية! واحدة جوزها دخل البيت ساكت… بدل ما تقول: “يمكن تعبان.” لا… تبدأ الموسم الجديد من مسلسل: “مين اللي مزعلك؟” “أنا عملت إيه؟” “أكيد في واحدة غيري!” وفي الآخر يطلع الراجل ساكت… عشان فريقه خسر ماتش! وواحد صاحبه اتأخر يرد عليه ساعة… يقعد يقلب في تاريخ العلاقة من أول ما اتعرفوا! “أكيد زهق مني…” “أكيد حد اتكلم عليا…” “أكيد بيبعد واحدة واحدة…” وفي الآخر تلاقي صاحبه نايم والموبايل على الشاحن! إحنا تعبنا نفسنا أكتر ما الناس تعبتنا. فيه ناس واخدة على عاتقها وظيفة “محلل نفسي مجاني” لكل اللي حواليها. يفسر الضحكة… ويحلل السكوت… ويقيس نبرة الصوت… ويحسب عدد الإيموجي في الرسالة! يا عم… هو إحنا في معمل تحاليل ولا عايشين؟ الحقيقة إن مش كل كلمة ليها معنى خفي. ومش كل تصرف رسالة مشفرة. ومش كل سكوت إهانة. ومش كل اختلاف مؤامرة. أوقات الناس بتكون تعبانة… مضغوطة… مستعجلة… مشغولة… وأوقات تانية… ببساطة مش فاضية تدور على طرق تستفزك زي ما أنت متخيل! أخطر عادة ممكن تعملها في نفسك… إنك تدقق في كل حاجة. لأنك هتفضل طول الوقت مرهق. هتخترع مشاكل… وتعيش في حروب… محدش غيرك يعرف إنها موجودة. اسمع… ابتسم… وعدّي. مش كل تعليق يستاهل رد. ومش كل تصرف يستحق جلسة تحليل. ومش كل كلمة لازم تفضل تلف بيها في دماغك لحد الفجر. فيه حاجات أحسن رد عليها… إنك تعتبرها ولا كأنها حصلت. التجاهل مش ضعف… التجاهل أوقات كتير ذكاء. لأنك وفرت طاقتك لحاجة تستحق. اعرف إن راحة البال مش معناها إن الدنيا بقت مثالية… راحة البال معناها إنك بطلت تدخل نفسك في كل قصة، وتبطل تلبس دور القاضي والمحقق والمحلل في نفس الوقت. سيب الناس تقول اللي تقول. وتتصرف بالطريقة اللي تناسبها. وأنت اختار الشيء الوحيد اللي تقدر تتحكم فيه… رد فعلك. لأن الحياة هتمشي أسهل بكتير… لما تبطل تفتش في النوايا، وتعيش على حسن الظن، وتدي دماغك إجازة من مسلسل “هو كان يقصد إيه؟” صدقني… فيه مشاكل كتير كانت هتختفي من حياتنا… لو بطلنا نحول كل موقف بسيط… لقضية رأي عام!
