المقالات والسياسه والادب
ينفع نحب تاني كتبت/د/شيماء صبحى
فيه لحظات في حياتنا بتعدّي كأنها نهاية العالم…
لحظة فراق، لحظة خذلان، لحظة قلبك يتخلّى عنه حد كنت شايف فيه الدنيا كلها.
ويمكن من كتر الوجع تقول: “مستحيل أحب تاني… مستحيل أفتح قلبي لأي حد بعده!”
بس هل بجد… مفيش حب تاني؟ ولا إحنا اللي قافلين على نفسنا من كتر الوجع؟
أوقات بنفتكر إن الشخص اللي راح، هو آخر محطة في الرحلة،
مع إن الحقيقة… إنه كان مجرد محطة واحدة، وربنا بيكتب لنا بعدها طريق جديد،
ويمكن حد جديد… من غير ما نكون حتى بندور عليه،
ربنا بيبعته، كده من حيث لا نحتسب…
بس السؤال: هل قلبك لسه قابل؟ ولا مقفول؟
عارف يعني إيه تقابل حد جديد؟
يعني تلاقي اللي يسمعك من غير ما تقوله كتير،
اللي يطبطب من غير ما تطلب،
اللي يشوف كسرك ويحترمه… مش يستغله.
اللي يكون طوق نجاة مش غرق جديد!
بس عارف إيه المشكلة؟
القلب ساعات بيرفض يصدق…
يقولك: لأ، كل الناس زي بعض،
أهو اللي قبله وجّعك، وده كمان هيعمل فيك نفس الحاجة…
فنقفل الباب قبل ما حد يخبط عليه.
المشكلة مش في الشخص الجديد…
المشكلة في إن قلبك لسه مأفول بإيد الذكرى اللي قبله،
لسه شايل هم اللي راح، وبيحاكم اللي جاي على جُرمه.
بس خد بالك…
ربنا لما ياخد منك حد، مش دايمًا عقاب…
ممكن يكون إنقاذ،
وإن الشخص ده ماكانش مناسب ليك،
أو ماكانش بيحبك زي ما كنت متخيّل،
وإنك كنت محتاج تطلع من العلاقة دي علشان تشوف نور تاني…
والنور ده ممكن يكون شخص جديد…
بس محتاج قلبك يبقى حاضر، مش غايب…
محتاج تدي نفسك فرصة تعيش، مش تفضل واقف عند الماضي.
الحب مش غلط…
الغلط إننا ندفن قلوبنا بالحياة ونقول: كفاية كده!
الحب مش ضعف…
الضعف الحقيقي إنك تفضل تعيش على فتات ذكريات، وتمنع عن نفسك فرصة جديدة تستاهلك بجد.
وربنا كريم… لما يبعد عنك حد، بيبعتلك اللي يشيلك ويعوضك،
بس مش بالإصرار، ولا بالسعي وراه…
ساعات كتير بييجي لوحده… فجأة… في وقت أنت مكنتش متوقع فيه أي حاجة حلوة.
يعني آه…
ينفع تحب تاني…
بس بشرط:
تسيب قلبك يتنفس، وتسامحه على اللي فاته،
وتفهم إن الحب مش جريمة،
وإنك تستاهل تعيشه تاني… بس المرة دي من غير ألم، من غير تنازل، من غير كسر.
افتح بابك…
يمكن اللي واقف عليه هو اللي كنت بتدعي ربنا يرزقك بيه زمان.
ويمكن يكون الحب الحقيقي…
اللي مفيهوش ليه؟ ولا إمتى؟ ولا وجع!
فهل يقبل قلبك شخص تاني؟
الإجابة عندك… مش عند اللي جاي.
إنت اللي بتفتح… أو بتقفل.
واللي هييجي، يستاهلك… لما تكون إنت شايف إنك تستاهل تتحب من جديد.
