كتبت/د/شيماء صبحى في مجتمعنا، أكتر كلمة بتتقال ورا أي تصرف: "هيقولوا إيه؟" "الناس هتقول عليا إيه؟" "ما ينفعش كده.. المجتمع مش هيرحم" "خلي بالك من الكلام.. خلي بالك من الشكل" وتلاقي نفسك مش عايش حياتك علشانك، لكن عايشها على مزاجهم، ورغباتهم، ورضاهم عنك، ومع كل خطوة بتفكر فيها، فيه صوت صغير في دماغك بيقول: "قالوا… وقالت… وهيقولوا" بس تعالى نقف لحظة ونسأل نفسنا: مين الناس دي؟ فينهم لما تقع؟ فينهم لما تتوجع؟ فينهم لما بتقفل على نفسك الباب وتبكي؟ فينهم لما بتدور على كلمة تريحك ومش لاقي؟ ولا في حَدّ منهم بيفيدك؟ كل اللي بيعملوه إنهم بيتكلموا… وخلاص. المجتمع ده؟ لو مشيت شمال، قالوا "خربانة" ولو مشيت يمين، قالوا "بتتمثل" لو لبست محتشم، قالوا "متخلفة" ولو لبست عصري، قالوا "عريانة" لو اتجوزت بدري، قالوا "لحقت ليه؟" ولو اتأخرت، قالوا "عنست!" ولو سكت، قالوا "غلبان" ولو اتكلمت، قالوا "قليل الأدب" يعني على أي حال، هيتكلموا! فـ ليه أعيش رَهينة كلامهم؟ ليه أخلي قراراتي على مزاجهم؟ ليه ألبس، وأحب، وأشتغل، وأتجوز، وأتكلم… بس عشان أُرضي ناس مش هترضى أبدًا؟ المشكلة إننا في مجتمع: بيهتم بـ "الشكل" أكتر من الجوهر بيقيس البني آدم باللبس، والوظيفة، والمظاهر وبيحب يحكي.. حتى لو مش فاهم حاجة والكارثة؟ إنه بيصدق أي حاجة، وينشرها أسرع من البرق! "قالت فلانة، وقال فلان، وهيقولوا عليك، وسمعتوا حصل إيه؟" كلام بيرنّ حوالينا 24 ساعة، وكل ده بيكوّن ضغط نفسي رهيب على أي حد عنده شوية مشاعر أو خوف من الناس. طيب نحلها إزاي؟ 1. افصل نفسك عن كلامهم إنت مش مجبر تبرر كل خطوة. اعمل اللي شايفه صح، والباقي مش مهم. 2. خليك واضح مع نفسك اسأل نفسك دايمًا: "أنا بعمل كده علشان نفسي؟ ولا علشان أرضي الناس؟" ولو علشانهم بس؟ راجع نفسك. 3. تجاهل الشوشرة إنت مش سوبر ماركت يرضي كل الزباين. اللي عاجبه عاجبه، واللي مش عاجبه يخبط دماغه في الحيطة. 4. اختار دوائرك ما تخليش كل الناس تبقى "أهل رأي" في حياتك. الناس اللي بتحبك بجد هتسندك، مش تتكلم عليك. 5. افتكر دايمًا: اللي قالوا عليك امبارح، نسيوك النهارده، واللي اتكلموا عليك، بيتكلموا على غيرك دلوقتي الناس بتنسى بسرعة، بس إنت اللي بتفضل شايل همهم على قلبك! وفي الآخر: مش كل صوت تسمعه لازم ترد عليه، ومش كل رأي لازم يفرق معاك ومش كل "قالت وقال" له قيمة عيش حياتك لنفسك، وخليهم يقولوا براحتهم… الناس مش هتسكت، بس إنت تقدر تسكّت خوفك منهم.
