سيطرة الاهتمام مفتاح قلب الست
سيطرة الاهتمام مفتاح قلب الست
كتبت/د/ شيماء صبحي
الست مش كائن معقد زي ما الرجالة فاكرين، هي بسيطة جدًا بس مشكلتها إنها بتحس أكتر ما بتفكر، وبتعيش التفاصيل اللي الراجل غالبًا بيعدّيها كأنها مش موجودة.
الست ممكن تفتكر كلمة حلوة اتقالت من سنة، أو نظرة فيها حب، أو موقف بسيط حصل، وده لأن التفاصيل عندها مش حاجات صغيرة.. دي بالنسبة لها “علامات حب”.
الست بتعشق الكلمة الحلوة، مش علشان بتدور على مجاملات، لكن علشان الكلمة دي بتغذي روحها، بتحسسها إنها لسه مهمة، إنها لسه في عنيه حلوة زي أول مرة شافها.
لكن كمان الكلمة لوحدها من غير فعل بتوجع، بتبقى شبه وعد ما اتنفذش.. كلام حلو على الفاضي.
ونفس الحكاية الفعل من غير كلام بيبقى ناقص.. لأن الست بتحب تسمع الحب زي ما بتحبه يتعمل.
الست بتحب اللي يسمعها حتى لو بتحكي حاجات ملهاش لازمة في نظره، بتحب اللي يشاركها تفصيله من يومها، اللي يسألها “مالك” بجد مش لمجرد السؤال، اللي يضحك معاها على حاجة غبيه حصلت في الشغل، واللي يسيب الدنيا كلها علشان يسمعها وهي بتحكي عن حلم سخيف شافته الصبح.
هي عايزة اللي يعاملها كطفلة أوقات، وكملكة أوقات تانية.
تحب اللي يدلعها بكلمة بسيطة، اللي ينده اسمها بلُطف، اللي يمد إيده على شعرها كأنه بيطبطب على قلبها مش على رأسها.
ده النوع من الرجالة اللي بيسيطر على قلب الست من غير ما يحس، من غير ما يلعب، ولا يمثل.
الاهتمام مش فلوس، ولا هدايا، ولا خروج كل يوم.. الاهتمام الحقيقي هو إنك تلاحظها، تشوفها، تحسها.
إنك لما تتأخر عنها تبعت تقولها “كنت مشغول بس كنت فاكرِك”،
لما تكون تعبانه تحس بيها قبل ما تقول.
الست اللي بتحس بالاهتمام ده بتدي أضعافه، بتدي حب وحنان وولاء يخلي الراجل نفسه يتغير من جواه.
التحليل النفسي:
من الناحية النفسية، المرأة مخلوق عاطفي جدًا، جهازها العصبي والهرموني مصمم يتفاعل مع المشاعر أكتر من المنطق.
الكلمة الطيبة بتنشّط عندها مناطق السعادة في الدماغ زي الأوكسيتوسين والدوبامين، وده بيخليها ترتبط بالشخص اللي بيديها المشاعر دي.
لما الراجل يهتم بتفاصيلها، دماغها بيفهم ده كـ “أمان عاطفي”، وده أهم حاجة بتدور عليها الست في أي علاقة.
لكن لما تهملها أو تقلل من إحساسها، بتحس إنها مش مرئية، وده بيكسرها من جوا أكتر من أي خيانة.
الاهتمام بالنسبه ليها مش رفاهية.. ده احتياج نفسي حقيقي،
وهو المفتاح اللي بيدخل بيه أي راجل لقلبها من غير ما يضيع عمره في محاولات السيطرة أو التمثيل.
وفي الآخر.. الست اللي لقت الاهتمام مش بتدور على الكمال، ولا على الجمال،
هي بتدور على راحة القلب..
على الراجل اللي لما تتكلم تحس إنه سامعها مش بس بُوده،
واللي لما تزعل يحضنها بالكلمة قبل الإيد،
واللي لما يشوفها متغيّرة يسألها “مالك يا حبيبتي؟” مش “في إيه؟”.
الست مش عايزة تسيطر،
هي عايزة تتحس،
ولو اتحسّت بصدق.. هتدي حب يخلي الراجل نفسه يتربى من جديد
نصيحة لكل راجل
لو عايز تكسب قلب الست بجد، متحاولش تبهرها.. حاول “تفهمها”.
مش لازم تكون أغنى واحد، ولا أوسم واحد، لكن لازم تكون أصدق واحد.
اسمعها وهي بتحكي عن حاجة تافهة كأنها بتحكي عن أهم خبر في حياتك،
خلي اهتمامك بيها عادة مش مجاملة،
وكل مرة تشوفها متغيرة اسأل نفسك: “يمكن ناقصها كلمة حلوة؟ يمكن محتاجة حضن؟ يمكن محتاجة بس تتسمع؟”
الست اللي بتحس إنك شايفها ومهتم بيها،
هتفضل تشوفك أنت الدنيا كلها
