المقالات والسياسه والادب
الثقة بقلم د/إلهام حسنى
الثقة احساس بيتبني جوا الانسان يوم ورا يوم
مش لحظة واحدة ومش كلمة بنقولها وخلاص
الثقة رحلة طويلة بتبدأ من جوه قبل ما تظهر برا
لما الشخص يشوف نفسه ويعرف قيمته
ويصدق انه يستحق الاحترام وقتها بس
يقدر يقف قدام الدنيا وهو ثابت مهما حصل
الثقة مش معناها انك ما تقعش او ما تغلطش بالعكس الثقة معناها انك لما تقع تقوم
ولما تغلط تتعلم
ولما تتأذي تداوي نفسك
وتمشي قدام
الثقة قوة هادية مش صوت عالي
هي حضور وشخصية وطريقة كلام وراحة داخلية تقولك انك ماشي في الطريق الصح حتى لو الطريق صعب
اللي عنده ثقة بنفسه ما بيتأثرش بكلام الناس بسهولة ما بينهزش من حد يحاول يقلل منه وما بيجريش ورا رضا الكل لانه عارف انه مهما عمل مش هيرضي كل الناس هو عارف انه يكفي نفسه
وده اعظم احساس ممكن يعمله الانسان لنفسه
الثقة بتخلي الشخص يواجه الحياة بشجاعة ويجرب ويخوض فرص جديدة من غير خوف كبير من الفشل لانه شايف الفشل خطوة مش نهاية الطريق
الثقة كمان بتبان في تعاملاتك مع الناس لما تكون واضح وصريح ولما تعرف حدودك وحدود غيرك وتقدر تقول لا من غير ما تحس بذنب وتقدر تقول اه وانت مطمن ومتأكد ان القرار صح ليك الثقة انك توقف قدام المراية وتشوف عيوبك ومميزاتك من غير جلد ولا قسوة ولا مبالغة تشوف نفسك بعيون حقيقية مش بعيون الناس
والثقة ممارسة يومية لما تختار تحب نفسك لما تكمل شغلك للآخر لما تواجه خوفك الصغير لما تصدق انك تستحق الاحترام وقتها هتلاقي الثقة بتكبر جواك ومع كل خطوة هتحس بفرق كبير في طريقة كلامك طريقة تفكيرك وطريقة وجودك في الحياة
