أول ظهور للمتهمين في واقعة الأجنة ارملة طبيب متوفى وموظف مجلس مدينة وعامل نظافة 

بقلم د. نجلاء كثير

أول ظهور للمتهمين في واقعة الأجنة

ارملة طبيب متوفى وموظف مجلس مدينة وعامل نظافة 

كنا بنفضي العيادة عشان نسلمها العامل كان مفروض يدفنهم رماهم في الزبالة.

الداخلية تكشف تفاصيل لغز أجنة المنيا.. مفاجأة من أرملة طبيب شهير

وزارة الداخلية كشفت تفاصيل القصة اللي قلبت السوشيال ميديا اليومين اللي فاتوا، بعد ما الناس اتصدمت بخبر العثور على أجنة بشرية مرمية في محافظة المنيا.

 يوم 14 فبراير الجاري، مركز شرطة المنيا جاله بلاغ إن الأهالي لقوا شوالين في صندوق زبالة جوه قرية هناك، ولما اتفتحوا كان المنظر مرعب، لقيوا جواهم 4 أجنة بشرية و5 مشيمات.

التحريات توصلت للي رمى الشوالين، وطلع عامل مقيم في نفس القرية. ولما اتقبض عليه وواجهوه، اعترف إن رئيسه في الشغل هو اللي سلمه الشوالين وطلب منه يدفنهم، وده كان بناء على طلب من أرملة دكتور نسا وتوليد معروف جدا.

تم استداء الأرملة، وهي طبيبة على المعاش دلوقتي، واعترفت بكل التفاصيل. قالت إنها لقيت الأجنة دي جوه عيادة جوزها الدكتور اللي اتوفى في شهر يناير اللي فات، ووضحت إن جوزها كان محتفظ بيهم عشان بيعمل عليهم أبحاث علمية لأنها كانت أجنة مشوهة.

عشان عقد إيجار العيادة خلص بعد وفاة الدكتور، الأرملة قررت تفضي المكان، وسلمت الأجنة لواحد من معارفها عشان يدفنهم بشكل لائق لكن الشخص ده سلمهم للعامل، والعامل استسهل وبدل ما يدفنهم راح رماهم في صندوق القمامة، حسب كلامها.

الجهات الأمنية خدت كل الإجراءات القانونية ضد كل الأطراف المتورطة في القصة دي، وأحيلوا كلهم للنيابة العامة عشان تباشر التحقيقات وتعرف كل التفاصيل عن ظروف حفظ الأجنة دي وطريقة التخلص منها اللي بتخالف القانون.