you only live once) تعيش مرة واحده
(you only live once)
تعيش مرة واحده
دكتورة فاطمه محمود
في دولاب كل منا اعزائى القراء بعض الملابس من الممكن أن تكون عزيزه عليك ولك معاها ذكريات حلوة كتير
بتحبها بس مبقتش بتريحك..
لانها ضاقت عليك.. بقت خانقاك وضاغطاك بتوترك..
آه بتحبها بس مبقتش مُناسبة ليك..
وإنت هنا بتفكر انك توَفَّق أوضاعك عليهم..
ياترى تعمل ايه….تخس.. تتخن.. تِروح.. تِيجي..المهم تيجى مقاسك و إنك تعرف تلبسهم..
كذلك في أشخاص مُعيَّنه بحياتك
بتحبهم هُمَّا كمان بس ضاقوا عليك..
مبقوش زي ما كانوا عندك مصدر للراحه والطمأنينة
بل بالعكس أصبحوا طاقات سامه وخانقينك نفسياً أغلب الوقت بتصرفاتهم
وضاغطينك عصـبياً وشايل همهَـمّ لتكرار أخطائهم
بتحبهم صحيح.. بس ما عندكش خلق لتتحمل أوضاعهم الحاليه السخيفه ومبقاش مُناسب ليك وجودهم
فإنت هنا كمان مُضطر أن تحاول توَفَّق كل أوضاعك عليهم
مُطلَوب منك إنك
تتغافل عنهم
وعن أخطائهم ..تتقبلهم.. تستحملهم.. تدعمهم.. تشجعهم..
تعلمهم فـتِزعلهم ـوتصالحهم
كل ده مضطر ليه ومُجبر عليه علشان بس تعرف تعيش معاهم.!
علاقاتك في حياتك..
زي ملابسك اللى انت بتحبها وأصبحت غير مناسبه لك.
حاول أن تراجع دولابك كل فترة..
لمصلحتك شوف إيه من هدومك ضاق عليك
إتغير مقاسه، أو مقاسك، المهم إنه بقى يضايقك
وبدل ما تفكر توَفَّـق أوضـاعك عليه علشان يناسـبك
اتنازل أو إتبرع بالأشخاص دول قصدي بـالهدوم اللى بتحبها وأصبحت غير مناسبه ليك
إتبرع بيهم لناس تانية تكون من أشكالهم و عيناتهم علشان تلبسهم
أكيد هايلاقوا ناس شبهم غيرك، أكيد هيلاقوا مقاسهم
من فضلك راجع ترتيب دولابك باستمرار وقم بتنظيف علاقاتك فالحياة قصيره
دكتورة فاطمه محمود
