الصديق الفرفوش رزق
الصديق الفرفوش رزق
بقلم تغريد نافع
قابلت أصدقاء كتير فى حياتك.فى منهم الجدع ومنهم الحنين ومنهم المستمع ومنهم السند. لكن فى صديق محدش بيتكلم عنه كتير الصديق الفرفوش .الصديق اللى أول ما يدخل أى مكان يملاه ضحك وهزار وطاقة إيجابية ويقدر ينسيك أحزانك أو أى تفكير زايد بيحرق فى دماغك.
الصديق الفرفوش كمان عنده مقدرة أنه يتكلم معاك فى مشاكلك فتقعد تضحك لحد ما عيونك تدمع من كتر الضحك، عنده فن تحويل أى مشكله لكوميديا سوداء ساخرة.
الصديق ده بيعدلك كيميا دماغك ويعلى هرمونات السعادة عندك وبيخرجك من أى اكتئاب محتمل ممكن تتعرض له.
كفاية أن كلمتين منه على نكتتين تلاقيه شدك برة دايرة أى وجع. تعرف هو إيه ؟! هو كأنه دوا مضاد اكتئاب ومسكن سريع لأى ألم جواك.
عاوز تعرف مين صديقك الفرفوش؟ أيوة هو اللى وأنت بتقرأ كلماتى جه فى بالك حالاً وابتسمت أما تخيلت صورته. حافظ عليه عشان ده فعلاً رزق فى الأيام الصعبة اللى أنت بتعيشها.
