صباح الخير ، وأسعد الله حياة الجميع ، دمتم بخير …حفظكم الله وحفظ أولادكم وحفظ عليكم نعمه ..
يمكن نادر اني أخرج بعيد عن العامرية لأن حياتي كلها فيها ، شغلي و سكني ومدارس اولادي ، لكن من حوالي اسبوع نزلت عند كوبري 21 العجمي كان الوقت الساعة تسعة الصبح ، شوفت مناظر صعبة اول مشهد كان قدام عيني اطفال وشباب مشردين متسخين ، منظر لبسهم وشعرهم شىء صعب نايمين وعايشين تحت الكوبري ، بيتعاطوا مخدرات علنا في نهار رمضان ، المشهد أو المشاهد الاكثر صعوبة رجالة كبار في السن بنفس الوضع وواحدة ست تعدت الأربعين من عمرها بنفس الحال لابسة جينز متوسخ حتي وشها متسخ تحس ان عليه طينة وبتشرب سيجارة ، والادهي والأمر شابة في العشرينات لابسة بيجامة ( دفاية ) وسايبة شعرها وواضح عليها اثر الإدمان ، المنطقة دي معروفة بتجارة الهيروين والبيسة ، شباب وكبار وستات وبنات أصبحوا مدمنين ومشردين ، يعني مثلا البنت الشابة دي لو اي حد طلب منها أي حاجة مقابل جرعة ( شمة ) حتوافق حتي لو طلب يعاشرها ، المنظر اللي شوفته صعب مهما كان الكلام مش حيكون زي ما تشوف ، الموضوع ده محتاج تدخل الحكومة لكن مش علي اساس اني دول مجرمين بل علي اساس ان دول مرضي محتاجين رعاية وعلاج ، في بنات وستات وشباب زي الفل بيتجروا للادمان ، تجار المخدرات منتشرين في المنطقة دي والحكومة ليس لها أي سيطرة عليهم ، بتعاقب اللي بيتعاطي وبتسيب التاجر يبيع لحد لما الموضوع يكبر ويبقوا مضطرين يغطوا عليه .
موضوع المشردين ده في اماكن كتير وبشكل كبير ، اطفال وكبار رجالة وستات وشباب ، منظر صعب جدا لما تلاقي بنت او ست نايمة في الشارع أو طفل نايم في الشارع معرضين لحاجات كتير ، موضوع المشرد المدمن اخطر خاصة لو بنت بتكون معرضة لأخطار كتيرة ، بعيدها تاني بنت زي اللي شوفتها دي لو محتاجة جرعة المخدرات ممكن تعمل اي شىء ، ممكن تسيب نفسها لاي حد وبأي تمن عشان جرعة المخدرات ، واحنا بنشوف اطفال رضع بيترموا في الشوراع وده سبب من الأسباب ، الموضوع محتاج تسليط الضوء عليه ، المتشرد في الشوارع ده مش شرط يكون مجرم ولكن الشوارع بتخليه مجرم .
