المقالات والسياسه والادب
سيبها تعدي كتبت/ د/شيماء صبحى
سيبها تعدي
في ناس بتقعد تبرر وتشرح وتدافع عن نفسها بعد ما تكون جرحتك، خانتك، كدبت عليك، أو خيبت ظنك بكل بساطة… لكن الحقيقة؟ أفعالهم كانت بتتكلم بصوت أعلى من أي مبرر.
اللي يعمل فيك كده، ماكانش محتاج فرصة يشرح… لأنه كان قدّامه مليون فرصة يتصرف صح وماعملش.
وهنا بييجي السؤال: أسمع له؟ أديه فرصة؟ ولا أسيب وعدّي؟
التطنيش مش ضعف… التطنيش حكمة
فيه فرق كبير بين إنك تسامح علشان قلبك نضيف… وإنك تفتح بابك تاني للي خربه.
اللي بيطنش مش غبي ولا بلا إحساس… ده شخص فهم إن عمره وصحته أغلى من التحقيق في كل تصرف جارح، وإن مش كل حاجة تستاهل الرد أو الوقفة.
تخيل كده إنك كل مرة حد يزعلك، تقعد تحلل ليه عمل كده، وبيفكر في إيه، وازاي ترد عليه، وإمتى ييجي يعتذر؟
ده استنزاف لطاقة مش طبيعية، وانت مش بنك طاقة مجاني لحد.
تحليل نفسي: ليه بندقق؟
كتير مننا عنده “احتياج للوضوح”، عايز يفهم علشان يرتاح. بس اللي مش واخدين بالنا منه إننا بنفتّش في عقل حد تاني، نحاول نفهم دوافعه رغم إن دوافعه وضحت من تصرفاته.
والحقيقة؟
اللي يحبك، مش هيأذيك… واللي يقدّرك، مش هيكسر بخاطرك.
إذن فـ ليه التدقيق؟
علشان نشوف هل احنا السبب؟
علشان نحاول نصلح؟
علشان نبرر تصرفهم؟
كلها دوافع من شخص لسه متعلّق، وده شيء مفهوم… لكن لازم نواجه نفسنا ونفك التعلّق ده بالواقع مش بالأمنيات.
رأي الدين:
الإسلام بيعلّمنا التسامح، بس مش الغباء.
ربنا قال: “والكاظمين الغيظ والعافين عن الناس والله يحب المحسنين”،
لكن كمان قال: “ولا تظلمون ولا تُظلمون”.
يعني تسامح؟ آه
تتغافل؟ ممكن
تفضل في علاقة تؤذيك؟ لا طبعاً.
والنبي ﷺ قال: “المؤمن لا يُلدغ من جحرٍ مرتين”،
يعني مرة تعلمت، التانية مسؤوليتك.
طيب أعمل إيه؟ الحلول العملية:
1. اعتمد التطنيش الذكي:
مش تجاهل مرضي، لأ… تجاهل واعي. انت شايف كل حاجة، لكن قررت إنك مش هترد، مش هتسأل، مش هتواجه… علشان انت اختارت نفسك.
2. نقّي علاقاتك:
خلي اللي حواليك ناس بتدفيك مش بتنزفك.
3. ما تديش قيمة للي ما قدّركش:
مهما كان… دمعة منك أغلى من مليون عذر من حد ما صانكش.
4. ركّز في نفسك:
صحتك، نومك، استقرارك النفسي… دول مش رفاهية. دول أولويات.
5. اركن الماضي وعيش يومك:
كل ما ترجع تعيد وتزيد في اللي حصل، انت بترجع توجّع نفسك. إنسحب بهدوء، وعدّي وكأنك ما شوفتش… لأنك أكبر من الوجع ده.
في الختام:
الحياة مش مستاهلة تدقيق على كل تصرف صغير…
سيبها تعدي، واحتفظ بقلبك لنفسك، ووقت ما تلاقي اللي يراعيه، اديله… بس بحذر.
واللي خانك؟ مش محتاج تسمع أعذاره، أفعاله سبقت كلامه.
لأن في ناس بتشرح كتير… بس بتتصرف قليل.
