أنا الحياة
أنا الحياة
بقلم د/إلهام حسنى
أنا مش دايمًا سهلة… ومش كل يومي ورد وياسمين.
بس أنا موجودة…
أنا اللحظة اللي بتضحكي فيها من قلبك بعد تعب طويل.
أنا الفرصة اللي بتجيلك فجأة بعد ما كنتي خلاص فقدتي الأمل.
أنا الشخص اللي بيحبك بصدق، من غير مصلحة… ومن غير ما يطلب في المقابل غير وجودك.
أنا مش وعد بالسعادة،
بس وعد بالتغيير… بالنمو… بالتعلم.
أنا اللي بخليكي تقعي عشان تتعلمي تقومي.
أنا اللي ببعِتلك دروس في هيئة ناس، ومواقف، وخيبات…
وبعلمك من كل وجع، حكمة، ومن كل خسارة، بصيرة.
أنا الحياة…
مش بس اللي بتعدي في السنين،
أنا اللي بتتكتب في ملامح وشك، في نبرة صوتك، في طريق مشيك بعد ما كبرتي وتغيّرتي.
أنا في لحظة سكوتك لما بتختاري تردي بصمت.
وفي دمعتك اللي نزلت وإنتي بتدّعي…
وفي ضحكتك اللي طلعت من غير ما تاخدي بالك، لأن حد حبك بصدق.
أنا مش كاملة… بس حقيقية.
مش عادلة دايمًا… بس دايمًا بأعطي فرص.
مش بحميكي من الأذى… بس بزقّك في طريقك علشان تكتشفي قوتك.
أنا الحياة…
لو فهمتيني، هتهدّي.
ولو سمعتيني، هتعرفي إني مش ضدك… أنا معاكي، بس على طريقتي.
أوعى تستعجليني،
وأوعى تظني إني نسيتك،
أنا بجمعلك اللي تستحقيه، مش اللي إنتي عاوزاه بس.
أنا الحياة…
أوقات ببان قاسية، بس في قلبي حنية،
أنا مش النهايات، أنا البدايات الجديدة…
أنا انتي، لما تختاري تبدأي من أول وجديد.
(بنت الحلم الكبير)
