إزاي الست تتعامل مع الراجل اللي كان بتاع ستات وتكسبه من غير ما تتأذي؟
إزاي الست تتعامل مع الراجل اللي كان بتاع ستات وتكسبه من غير ما تتأذي؟
كتبت/د/ شيماء صبحي
الراجل اللي كان “بتاع ستات” محتاج ذكاء، مش حرب.
لو دخلتي العلاقة بنية إنك “تربيه” أو “تغيريه” هتتعبي وتتحرقي،
لكن لو دخلتيها بنية إنك تفهميه وتوازنّيه، هتكسبى من غير ما تكسري نفسك.
تعالي نمشيها واحدة واحدة
أولاً: ما تحاوليش تكمليه
هو مش ناقص ست.. هو ناقص استقرار نفسي.
فما تحاوليش تمثلي دور المثالية اللي تعوض كل اللي فات،
خليكِ نفسك ببساطة، وكوني حقيقية.
اللي شاف كتير، بيتشدّ للحقيقية مش للتمثيل.
ثانيًا: ماتسأليش عن الماضي
الماضي بالنسباله فيلم اتعرض خلاص، ما تفتحيهوش تاني.
كل مرة تسأليه عن واحدة أو عن حاجة فاتت،
بتفكّريه بالحياة اللي بيحاول يهرب منها.
خليه يعيش معاكِ “النهارده” مش “امبارح”.
ثالثًا: حطي حدودك من غير ما تعاندي
الراجل ده متعود على ستات بتتساهل أو بتتدلع علشان تكسبه،
لكن لما يلاقي واحدة عندها حدود واضحة وكرامة راقية،
هتحيره في الأول بس بعدين هيحترمها ويحس إنها مختلفة.
الهدوء هنا هو السلاح..
مش لازم تعلي صوتك علشان تفرضي احترامك،
الاحترام الحقيقي بييجي من ثباتك واتزانك مش من عصبيتك.
رابعًا: عامليه كراجل مش كمراهق
هو اتعود في حياته إنه يبقى “المطارد”،
كل مرة بيجري ورا الإعجاب والإثارة،
لكن لما يلاقي واحدة بتتعامل بعقل،
مش بتغار زيادة، ومش بترقب،
هيحس لأول مرة إنه قدّام ست كبيرة مش بنت بتنافس.
وده إحساس يخليه يرتاح ويهدى.
خامسًا: خليه يدوّر على نفسه جواك
الراجل ده فقد الإحساس بالعمق بسبب العلاقات السطحية الكتير،
فلو لقى معاكي نضج روحي ونفسي،
هيبدأ يرتبط بيك على مستوى أعمق من الجسد أو الشكل.
يعني كوني له الأمان اللي عمره ما شافه، بس من غير ما تكوني أمه.
التحليل النفسي:
الست اللي تعرف تتعامل مع النوع ده لازم تكون واعية بنفسها قبل ما تفهمه هو،
علشان ما تدخلش اللعبة وتتحول لضحية.
العلاقة دي محتاجة اتزان بين الأنثى والواعية،
أنثى تخليه يحبها، وواعية تخليه يحترمها.
الراجل اللي كان بتاع ستات، بيحتاج حب مش مؤلم،
حب هادي، ما فيهوش مطاردة ولا كوابيس الغيرة،
علشان يبدأ يصدق إن الاستقرار مش ملل.. لكنه راحة.
الخلاصة:
لو دخلتي حياة راجل كان بتاع ستات،
ما تخافيش، بس ما تندفعيش.
خليه يحب فيكي السلام مش الصراع،
خليه يكتشف إنك مش رقم جديد في دفتره،
لكن آخر صفحة.. اللى بعدها مفيش
