إمبارح وقعت والنهاردة بقوم
إمبارح وقعت والنهاردة بقوم
كتبت/ شمس فتحى
إمبارح وقعت
وقع مني صبري ووقع مني كلامي ووقع مني مزاجي كله
زعقت وعيطت وجلدت نفسي لحد ما نمت وأنا حاسة إني مش نافعة
بس النهاردة؟
النهاردة صحيت وقررت حاجة مختلفة
قررت أتصالح مع نفسي
قررت ابدأ من جديد حتى لو بخطوات بسيطة وبطيئة
لأن البطيء اللي بيكمل أحسن من السريع اللي بيقع
هبدأ ازاي؟
مش هحاول أبقى سوبر وومن في يوم
مش هصلح كل حاجة مرة واحدة
هبدأ بـ 3 حاجات بس
حاجة ليا أنا
هشرب مية هغسل وشي هاخد 5 دقايق قهوة من غير موبايل
هفكر نفسي إني “بني ادمة” مش “الة بتخدم”
حاجة لبيتى
مش هروق الشقة كلها هختار ركن واحد بس
مش هطبخ 3 أصناف هعمل آكله واحدة تتعمل بحب كفاية
حاجة لقلبي
هعتذر لو غلطت إمبارح
وهحضن
هقول “بحبكم” و “أنا موجودة” حتى لو اليوم ملخبط
الوقعة مش نهاية
الوقعة علامة إني كنت شايلة فوق طاقتي
والقيام مش لازم يبقى نطة كبيرة
ممكن يبقى خطوة وبعدها خطوة
وبعدها نفس
لو إنتي زيي ووقعتي امبارح تعالي
نقوم سوا النهاردة
ببطء بس بثبات
واحدة واحدة هنوصل
