اتكلمي بلغة حبه مش بلغتك انتي!
اتكلمي بلغة حبه مش بلغتك انتي!
كتبت/د/شيماء صبحى
كل واحد فينا ليه لغة حب خاصة بيه، يعني الطريقة اللي بيحس بيها إن التاني بيحبه بجد. المشكلة إن أغلب الستات فاكرين إن الراجل لازم يحب زيهم، بالكلام الحلو والاحتواء والرومانسية والوردة والمكالمات الطويلة، لكن الحقيقة لأ… الراجل بيفكر بشكل تاني خالص.
لغة الحب عند الراجل مش دايمًا كلام ولا شِعر، الراجل بيحس بالحب من الممارسة الحميمة، من القرب الجسدي، من اهتمامك بجسده ورغبته، من إحساسه إنك فاهمة احتياجه ومش بتهاجميه عشانه. الراجل لما بيحس إن مراته فاهمة دا، بيبقى أحنّ، أهدى، وأقرب منها نفسيًا كمان.
إنما الست، حبها دايمًا في التفاصيل الصغيرة… في كلمة “وحشتيني”، في نظرة فيها شوق، في حضن بدون سبب، في اهتمام بسيط، في رومانسية وكلام ناعم. عشان كده لما الراجل يديها حب بالجسد بس، بتحس إنه بعيد ومش بيحبها كفاية، رغم إن في نظره هو دا التعبير الأكبر عن الحب.
التحليل النفسي:
الفرق بين لغة الحب عند الرجل والست جاي من تكوين نفسي وجسدي مختلف. الراجل بيترجم الحب عن طريق الفعل والممارسة، لإنها بالنسباله وسيلة تواصل ومشاركة وطمأنينة، مش مجرد شهوة. لما يقرب، بيقول من غير كلام “انتي ليا وأنا ليكي”.
أما الست فبتدور على المشاعر اللي قبل الفعل، لإنها محتاجة تحس بالأمان العاطفي الأول عشان تقدر تفتح مشاعرها وجسدها بعدين.
ولما الاتنين مايفهموش الفرق دا، بتحصل الكارثة!
هو يحس إنها بترفضه، فـيبعد.
وهي تحس إنه بيقرب عشان رغبة بس، فـتتبرد أكتر.
وتتحول العلاقة لحرب صامتة بين لغة جسد مش مفهومة ولغة مشاعر مش مترجمة.
النصيحة:
اتعلمي تتكلمي بلغته زي ما نفسك هو يتكلم بلغتك.
اعملي توازن بين الرومانسية اللي بتحبيها، وبين القرب اللي هو بيحتاجه.
خدي خطوة ليه من غير ما تحسي إنك بتتنازلي، بالعكس… دي طريقة ذكية للحفاظ على الحب.
ولما هو يشوف إنك بتفهميه، هيبدأ هو كمان يتعلم لغتك من غير ما تطلبي.
الحب مش إن كل واحد يفرض لغته، الحب الحقيقي إننا نترجم لبعض
