احنا مش بخير
احنا مش بخير
بقلم د/إلهام حسنى
الجملة دي يمكن تكون ابسط جملة ممكن نقولها في الوقت ده لكنها في نفس الوقت اكتر جملة ناس كتير مش قادرة تقولها
احنا بقينا شاطرين اوي في اننا نقول انا تمام
تمام واحنا مرهقين
تمام واحنا من جوه مكسورين
تمام واحنا بننام واحنا شايلين هم بكرة
تمام واحنا بنضحك مع الناس واحنا مش عارفين هنكمل اليوم ازاي
بقينا نعيش حياة كاملة واحنا بنخبي حقيقتنا عن بعض
الام بتقول لولادها انا كويسة وهي مش عارفة تعمل ايه في مصاريف البيت
والاب بيقول انا تمام وهو شايل فوق طاقته ومش عايز حد يحس انه عاجز
والبنت بتضحك مع صاحباتها وهي من جواها بتسأل نفسها هو انا ليه حاسة بالوحدة دي كلها
والشاب بيحاول يظهر قوي وهو خايف من المستقبل ومن الشغل ومن المسؤولية ومن بكرة
والطفل نفسه بقى يسمع كلام اكبر من سنه ويشوف مشاكل اكبر من قلبه ويطلب حاجات بسيطة جدا اسمها الامان والاهتمام
احنا في زمن الناس فيه بتشوف بعض طول الوقت لكن قليل جدا اللي بيسأل بصدق انت عامل ايه
مش عامل ايه اللي بتتقال واحنا مستنيين الاجابة وخلاص
انا اقصد عامل ايه بجد
نفسك عاملة ايه
قلبك مستحمل
بتنام مرتاح
بتصحى عندك طاقة للحياة
ولا كل يوم بتقوم وتقول لنفسك هنعديه وخلاص
يمكن اكتر حاجة محتاجين نفهمها اليومين دول ان الانسان مش ماكينة
مش مطلوب منه يفضل قوي طول الوقت
مش مطلوب من الام تفضل صامدة مهما حصل
ومش مطلوب من الاب يخبي تعبه عشان محدش يقول عليه ضعيف
ومش مطلوب من البنت انها تضحك عشان محدش يسألها مالك
ومش مطلوب من الشاب انه يعرف يحل كل حاجة لوحده
كلنا بشر
بنتعب
بنخاف
بنتوه
بنقع
وبنحتاج حد يقول لنا انا شايف تعبك
انا حاسس بيك
انا مش هحكم عليك
انا موجود
يمكن دي اكتر كلمة ناقصة في حياتنا دلوقتي
انا موجود
مش هديك محاضرة
مش هقولك انت السبب
مش هقولك غيرك عنده مشاكل اكتر
مش هقارن وجعك بوجع حد
انا بس هقعد جنبك
لان في اوقات كتير الانسان مش بيحتاج حل
بيحتاج حضن
بيحتاج كلمة طيبة
بيحتاج حد يسمعه من غير ما يحوله لمتهم
بيحتاج يحس انه مش لوحده
المشكلة اننا بقينا بنقسو على بعض واحنا اصلا كلنا محتاجين الرحمة
بنحكم على شكل البيت
على تربية الاولاد
على لبس الناس
على ظروفهم
على شغلهم
على جوازهم
على قراراتهم
ومحدش فينا عارف اللي بيحصل خلف الابواب
محدش عارف كام مرة شخص نام وهو بيبكي
محدش عارف كام شخص بيضحك قدام الناس وبعد ما يقفل باب بيته بيقع من التعب
محدش عارف كام ام بتتمنى بس يوم واحد تعديه من غير خوف
وكام اب بيحسب فلوسه اخر الشهر عشان يعرف هيكفي ايه ومش هيكفي ايه
وكام شاب بيقدم في شغل ورا شغل ومش لاقي فرصة
وكام بنت بتحاول تبقى قوية وهي محتاجة حد يقول لها انتي مش مطالبة تثبتي حاجة لحد
وعشان كده يمكن احنا محتاجين نراجع طريقة تعاملنا مع بعض
مش كل حد ساكت مرتاح
ومش كل حد بيضحك سعيد
ومش كل حد بيقول انا كويس فعلا كويس
في ناس بتستغيث من غير صوت
وفي ناس بقت محترفة في اخفاء تعبها
وفي ناس كل اللي نفسها فيه ان حد يطمنها ان الدنيا لسه فيها خير
واحنا محتاجين نرجع لبعض انسانيتنا
محتاجين نبطل نفتكر ان القسوة هي القوة
وان الصوت العالي هو الشخصية
وان التجاهل هو الحل
وان الاعتذار ضعف
وان الاحتواء تدليل
وان الرحمة بتفسد الناس
الحقيقة ان اقوى انسان مش هو اللي يعرف يكسر اللي قدامه
اقوى انسان هو اللي يقدر يطمن حد خايف
ويستر على حد غلط
ويسند حد واقع
ويسمع حد مش قادر يتكلم
ويقول كلمة حلوة في وقت ممكن تكون الكلمة دي سبب ان انسان يكمل يومه
يمكن احنا مش هنقدر نغير العالم كله
لكن نقدر نغير العالم الصغير اللي حوالينا
نقدر نرجع البيت وفيه كلمة طيبة
نقدر نسأل اولادنا مش بس ذاكرت ولا لا
لكن نسألهم فرحانين ولا لا
نقدر نبص في عين امهاتنا وابائنا ونقول لهم ربنا يخليكم
نقدر نسأل اصحابنا اللي اختفوا فجأة يمكن يكون عندهم كلام كتير مش عارفين يقولوه
نقدر نرحم بدل ما نحكم
ونحتوي بدل ما نلوم
ونسمع بدل ما نقاطع
ونطمن بدل ما نخوف
لان الدنيا اصلا تقيلة بما يكفي
والناس شايلة فوق قلوبها حاجات محدش شايفها
فلو مش هتقدر تخفف عن حد على الاقل متزودش عليه
ولو مش هتقدر تساعد متوجعش
ولو مش هتقدر تقول كلمة حلوة متقولش كلمة تكسر
احنا كلنا في النهاية عابرين
وكل واحد فينا عنده معركة محدش يعرف عنها حاجة
فخلينا نكون رحمة في حياة بعض
مش امتحان جديد
خلينا لما حد ييجي لنا وهو تعبان يلاقي مكان امن
مش محكمة
ولما حد يعترف انه خايف نطمنه
مش نسخر منه
ولما حد يقع نمد ايدنا
مش نصوره وهو واقع
يمكن احنا محتاجين نرجع نفتكر معنى بسيط جدا
ان الانسان قبل ما يكون ناجح او فاشل
غني او فقير
متعلم او غير متعلم
قوي او ضعيف
هو انسان
له قلب
وله طاقة محدودة
وله وجع
وله احلام
وله لحظات بيحتاج فيها حد يمسك ايده
وفي وسط كل الضغوط اللي عايشينها
يمكن اعظم حاجة نقدر نقدمها لبعض هي الرحمة
رحمة في الكلام
رحمة في الحكم
رحمة في البيت
رحمة مع اولادنا
رحمة مع ازواجنا وزوجاتنا
رحمة مع اهلنا
رحمة حتى مع الشخص اللي مختلف عننا
لاننا ببساطة مش عارفين كل واحد بيحارب ايه
وفي يوم من الايام ممكن نكون احنا نفسنا الشخص اللي محتاج كلمة طيبة
ممكن نكون احنا اللي نقول انا تمام واحنا مش تمام
وساعتها هنفهم ان كلمة بسيطة زي انا جنبك كانت تساوي كتير
فلو هتسأل حد النهارده عامل ايه
اسأله بجد
ولو قالك انا كويس
بص في عينه
يمكن يكون محتاج يقول لك الحقيقة
ولو حسيت ان حد متغير
متقولش هو ماله
اسأله
يمكن سؤالك ينقذه من يوم صعب
ولو لقيت انسان بيضحك كتير
متفترضش انه سعيد
ولو لقيت انسان ساكت
متفترضش انه قوي
ولو لقيت انسان بيطلب مساعدة
متعتبرهاش هزيمة
احنا محتاجين بعض اكتر مما بنتخيل
والحياة مهما كانت قاسية ل
سه فيها فرصة اننا نكون سبب في راحة انسان
يمكن كلمة منك تغير يوم
ويمكن حضن يغير حياة
ويمكن موقف صغير يخلي انسان يصدق ان الدنيا لسه بخير
بنت الحلم الكبير
