اصعب وقت
بقلم تغريد نافع
أصعب وقت ممكن يمر به أي إنسان أما يكون مش قادر من زحمة وضغوط الحياة يتواصل مع نفسه. يسأل نفسه إيه ممكن يفرحني ؟ إيه اللي بيزعلنى ؟ ايه الإضافة اللى محتاجها في حياتى ؟ إيه نوع الطبطبة إللي ممكن تريحني في الفترة دى ؟
فى الحقيقة احنا بنوصل للمرحلة دى غالباً لسببين وأحياناً اكتر .
بس أهم سببين أنك مسحول أوي لدرجة مش لاقى وقت تفضى لنفسك.
او لانك تاية ومش عارف اصلاً أنت عاوز ايه ؟
في الحالتين تواصلك مع نفسك بيبقي صعب والأصعب لو سبت نفسك لتراكمات متكررة من نفس النمط ده.
في الحالة دى غالباً جسمك هيعبر بالنيابة عنك .
هتلاقي صداع مزمن من غير تفسير ،وجع وألم في عمودك الفقرى فجأة ،معدتك تحسها هتتقطع مع أقل أكل او شرب ،النوم هيخاصم عيونك وهتنام بالكتير ساعتين بالمهدئات.
ايه المطلوب منك في الحالة دى؟!
كل ألم بتحسه في جسمك بيعبر عن كل فكرة او كلمة او لأ كانت لازم تتقال في وقتها ومتقالتش.
جسمك بينبهك لألم نفسك.
تواصل مع نفسك وطبطب عليها وافهمها وحاول تطمنها وتريحها هى اهم من كل الآخرين ودى مهمتك أنت قبل ما تكون مهمة إللي حواليك. حب وطمن وادعم وريح نفسك هترتاح بنسبة كبيرة.
