افرح بخسارتك واكسب نفسك 

افرح بخسارتك واكسب نفسك

كتبت/د/ شيماء صبحي 

في لحظه معينه في حياتك هتكتشف إن كل الخسارات اللي عديت بيها، سواء أشخاص، علاقات، فرص، شغل أو حتى ذكريات، كانت ولا حاجه قدام إنك تخسر نفسك.

الناس بتفتكر إن المكسب في إنك تفضل ماسك في أي حاجه أو أي حد، بس الحقيقه إن أعظم مكسب هو إنك تلاقي نفسك في الآخر لسه موجوده، واقفه على رجليها، متكسرتش.

إنت ممكن تخسر شخص كنت فاكر إنه ضهرك، وتخسر علاقه كنت شايف إنها هتدوم، وتسيب مكان كنت معتبره أمانك، وتتخيل إنك كدا اتهزمت. بس مع الوقت هتفهم إنك لو فضلت متمسك باللي بيكسرك، كنت هتخسر أغلى حاجه عندك… “نفسك”.

الخساره اللي وجعتك امبارح، هتكون سبب إنك تبني نفسك النهارده. الناس اللي مشيت، كانوا امتحان عشان يبينولك إنت قد إيه قوي. والمواقف اللي علمتك الوجع، كانت بتجهزك تبقى ناضج أكتر، وتبقى عندك مناعه ضد اللي جاي.

إوعى تفتكر إنك بخسارة حد فقدت قيمتك… لأ، إنت ربحت راحة بالك، ربحت وقتك، وربحت سلامك النفسي. اللي ميعرفش يحافظ عليك، ميستحقش وجودك. اللي ميقدرش قيمتك، خسارتك بالنسباله مش هتساوي حاجه، بس إنت كسبت حاجه أهم: إنك عرفت قيمتك بنفسك.

أوقات ربنا بيشيل من طريقك ناس أو حاجات، مش عشان يعاقبك، بالعكس… عشان يديك فرصه تلاقي نفسك وتعيد ترتيب حياتك. وساعتها هتفهم إن الخساره الحقيقيه مش إن حد يسيبك، الخساره الحقيقية إنك تسيب نفسك وتضيع معاهم.

فـ افرح بخسارتك… لأنك كسبت أهم وأغلى من أي حاجه أو أي حد: كسبت نفسك.

خطوات عملية تحافظ بيها على نفسك بعد أي خساره:

1. اعرف قيمتك: اكتب مميزاتك وإنجازاتك، مهما كانت صغيره، وافتكرها وقت ما تحس إنك قليل.

2. اقطع المقارنه: بلاش تبص للي مشي أو اللي عنده أكتر منك، ركّز في اللي معاك.

3. خلي وقتك ليك: استثمر في نفسك، اقرا، اتعلم، مارس هواياتك.

4. احط حدودك: متسمحش لحد يتجاوز على راحتك النفسيه عشان ما تخسرش سلامك.

5. اقبل الألم: متحاولش تنكره، اديه لنفسك فرصه تعيط وتفرّغ، بس متقفش عنده.

6. ابدأ من جديد: كل نهايه فرصه لبدايه أنضج وأقوى، متخليش الخوف من الخساره يمنعك تعيش.