اقوى دليل كتبت /سما فتح الله خليك تقيل ...مالك مدلوق كدة ليه عزز نفسك شويه .. ابعد حبه تزيد محبه بالعكس اطلق عنان مشاعرك وحلق بسماء الحريه والتلقائيه اللي بيحبك بجد دايمًا مستعجل… مستعجل يطمن عليك حتى لو معندوش حاجة يقولها، مستعجل يشوفك ولو دقيقة، مستعجل يصالِحك لأن زعلك بيوجعه، مستعجل يفرحك بكلمة، بحضن، أو حتى برسالة بسيطة تقول “أنا جنبك”. الحب الحقيقي دايمًا فيه لهفة… اللهفة دي مش بس شوق، دي احترام، واهتمام، وخوف على قلبك يتكسر. أما اللي دايمًا واخد الأمور براحة زيادة… اللي مش مستعجل يسمعك، ولا يفهمك، ولا يرد على سؤالك… ممكن يكون لسه مش عارف قيمتك، أو مش قد العلاقة دي أصلاً. وخلي بالك من حاجة مهمة: لما تلاقي نفسك مش مستعجل تشوف حد، أو تتكلم معاه، أو تفرّحه… ساعتها لازم تقف وتسأل نفسك: هل الشخص ده لسه واخد مكان في قلبك؟ ولا وجوده بقى عادة؟ الاستعجال عمره ما كان ضعف، ده أوقات بيكون أقوى دليل حب. لما حد يستعجل يطمنك، أو يكون أول واحد يفرحلك… اعرف إنك عزيز عليه بجد. وفي الآخر… اللي مستعجل عليك، عمره ما هيخليك تستناه
