البِنْت اللي فاهمة قيمتها ماحدّش يقدر عليها
البِنْت اللي فاهمة قيمتها ماحدّش يقدر عليها
كتبت/ د/شيماء صبحي
ماتستهنّش ببنت عارفة هي مين وبتعمل إيه. البنت دي مش محتاجة تعمل مجهود علشان تثبت نفسها، لأنها ببساطة فاهمة نفسها كويس.
عارفة إمتى تكون في قمة أنوثتها.. اللبس اللي يليق عليها.. الكلام اللي يِحسّس اللي قدامها إنها رقيقة وهادية.. وازاي حضورها يكون طري وخفيف ومليان جمال.
وفي نفس اللحظة، تلاقيها قادرة تبقى أصلب من الرجالة. مش قسوة ع الفاضي ولا عناد ملوش لازمة، لأ.. صلابة العاقلة اللي عدّت على مواقف كسّرت غيرها.. وهى لأ، قامت. صلابة الست اللي لو شالت بيت على كتافها متتعبش، واللي لو اضطرت توقف لوحدها في وش الدنيا.. توقف.
هي بنت بتعرف تتدلّع وقت الدلع.. وتبقى طفلة في حضن اللي يستاهل.
وبتعرف تشيل مسؤوليات الحياة من غير ما تمنّ ولا تشتكي.. لأن عندها شخصية مش متعلقة بحد، وعندها قدرة تعتمد على نفسها وتسند نفسها بنفسها.
عارفة إمتى تكون رقيقة وهادية.. وامتى تبقى باردة وقاسية ومش فارق معاها حاجة. مش قسوة.. لأ، بس لأن في لحظات لازم تحافظ فيها على نفسها من اللي يستغل طيبتها.
وعارفة إمتى تبقى طيبة وجدعة وكتفها يتحمّل الناس.. وامتى تقول “لأ” وترجع حدودها مكانها.
البنت اللي عرفت قيمتها.. ماحدّش يقدر يقلل منها، ولا يضحك عليها، ولا يخدعها بسهولة.
ليه؟
علشان هي مش واحدة لسة بتدوّر على اعتراف أو اهتمام من حد. هي خلاص، لقت نفسها.
هي اللي بتصنع احترامها بيديها.
اللي لو اتجرحت.. تتعلم.
لو خسرت.. ما تقعش.
لو اتحاربت.. ترجع أقوى.
فـ ماتستهنّش ببنت عارفة هي مين.. لأنها فعلاً أكتر حد في الدنيا يخوّف.. ويطمن.. ويتهزلو ألف حساب في نفس الوقت.
