من أكثر المشكلات التي تواجه بيوت كثير من الأشخاص إن بعض الحموات يتدخلوا في حياة أولادهم بعد الزواج بشكل مبالغ فيه، لدرجة توصل أحيانًا إلى الغيرة من زوجة الابن أو محاولة السيطرة على قرارات البيت. التدخل الزائد ده بيخلق توتر ومشاكل بين الزوجين، وبدل ما يكون البيت مليان حب واستقرار، يتحول لساحة خلاف دائم.
الإسلام وضع قواعد واضحة للعلاقة الزوجية، وربنا سبحانه وتعالى قال في كتابه الكريم: “وَمِنْ آيَاتِهِ أَنْ خَلَقَ لَكُمْ مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً” [الروم: 21]. وده معناه إن الزواج قائم على المودة والرحمة، وإنه شركة حياة بين الزوج وزوجته، كل واحد فيهم ليه دوره، ولازم يعيشوا مع بعض في احترام وخصوصية من غير تدخل طرف تالت.
الحما مكانتها كبيرة وبركة في البيت، لأنها ام ربت وكبرت وليها مكانه عظيمه ..لكن دورها الطبيعي هو الدعاء لأولادها ومساندتهم وقت الحاجة، مش إنها تهدم الاستقرار أو تخلي الزوجة تحس إنها في مقارنة أو منافسة.
في النهاية، الزوج الحكيم هو الذي يوازن بين بره بأمه وحسن عشرتُه لزوجته، علشان البيت يفضل قائم على الحب والسكينة، زي ما ربنا أمرنا… وهذه بعض نصائح للزوج للحفاظ على التوازن بين أمه وزوجته العدل في المعاملة : خليك عادل بين أمك وزوجتك، ما تظلمش دي على حساب دي. برّ الأم واجب عظيم، لكن كمان حقوق الزوجة واجبة، وربنا هيحاسبك على الاتنين. الخصوصية : لازم يبقى في حدود واضحة: قرارات البيت بينك وبين زوجتك فقط، من غير تدخلات، علشان تحافظ على الاستقرار. الكلمة الطيبة : طمّن أمك بكلام حلو وبرّها دايمًا، وفي نفس الوقت احتوي زوجتك بالكلمة الطيبة والمعاملة الحسنة. الحزم وقت اللزوم : لو حصل تدخل مبالغ فيه، لازم تتكلم مع أمك بلطف لكن بحزم، وتوضح إن ده بيأثر على بيتك إظهار التقدير : خلّي زوجتك تحس إنك مقدّرها، وفي نفس الوقت خليك بار بأمك علشان ما تحسش إنها فقدتك بعد الجواز.
وبكده الزوج يقدر يحافظ على أمه تاج فوق راسه، ويحافظ على زوجته شريكة حياته وسكنه، زي ما ربنا قال: “لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً”.
